„ქოლ-ცენტრებთან“ დაკავშირებით საგამოძიებო კომისიის შექმნას ეწინააღმდეგება „რუსული ოცნება“, რადგან ეშინიათ დამოუკიდებელი საგამოძიებო კომისიის შექმნის, რომელიც სიმართლეს გამოიტანს ზედაპირზე,- ამის შესახებ „ერთიანი ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

პეტრე ცისკარიშვილის მტკიცებით, “ქოლ-ცენტრებს” „ქართული ოცნება“ მფარველობს.

„ამ საკითხთან დაკავშირებით მნიშვნელოვანია, რომ მოვიყვანოთ ორი ფაქტი, რისი მოწმეებიც პრაქტიკულად ყველა ვართ, მთელი ქვეყანა. პირველი - ჩამოვიდნენ გერმანელი გამომძიებლები, სადაც მივიდნენ, რომელ ორგანიზაციასთანაც დაიწყეს თანამშრომლობა, იყო „ანტიკორუფციული მოძრაობა“ და როგორც კი პირველივე იდენტიფიცირებული “ქოლ-ცენტრის“ სავარაუდო ლოკაციაზე მივიდნენ, ყველაფერი დახვდათ ალაგებული, გაწმენდილი, რადგან სამწუხაროდ, დაუშვეს ეს შეცდომა და შეატყობინეს ქართველ სამართალდამცავებს, რომ ამა და ამ ლოკაციებზე აპირებდნენ მისვლას. ყველაფერი დახვდათ ალაგებული, არანაირი „ქოლ-ცენტრი“ არ იყო. აქედან გამომდინარე, ძალიან მარტივია ვივარაუდოთ თუ ვინ მფარველობს ამ „ქოლ-ცენტრებს“. მეორე - ამის გაგრძელებაა ის, რომ პარლამენტში მთელი ოპოზიცია, ყველა ოპოზიციურად განწყობილი დეპუტატი, არ აქვს მნიშვნელობა რომელ ფრაქციას წარმოადგენს, ითხოვს საგამოძიებო კომისიის შექმნას „ქოლ-ცენტრებთან“ დაკავშირებით. ვინ ეწინააღმდეგება ასეთ საგამოძიებო კომისიის შექმნას? „რუსული ოცნება“ კობახიძე, ღარიბაშვილის მარიონეტები პარლამენტში ისინი არ ქმნიან, არ აჭერენ ღილაკს თითს, რადგან ეშინიათ ასეთი დამოუკიდებელი, მეტ-ნაკლებად დამოუკიდებელი საგამოძიებო კომისიის შექმნის, რომელიც სიმართლეს გამოიტანს ზედაპირზე“, - განაცხადა პეტრე ცისკარიშვილმა.