მსოფლიო სასურსათო პროგრამის (WFP) ხელმძღვანელის, სინდი მაკკეინის განცხადებით, მსოფლიოს გამოკვება გაჭირდება, თუ რუსეთი უკრაინის მარცვლეულის ექსპორტთან დაკავშირებული შეთანხმებიდან გავა.
სინდი მაკკეინმა BBC-ისთან ინტერვიუში განაცხადა, რომ შეთანხმება, რომელსაც ვადა 18 მაისს ეწურება, უნდა განახლდეს.
„მათ უნდა განაახლონ შეთანხმება. ჩვენ ვერ შევძლებთ რეგიონის გამოკვებას, რომ აღარაფერი ვთქვათ მსოფლიოზე, თუ ისინი ამას არ გააკეთებენ. მოგეხსენებათ, უკრაინა ადრე საკმაოდ დიდწილად ევროპის პურის კალათა იყო და ახლა ეს აღარ ხდება. ჩვენ გვჭირდება მარცვლეულის გამოტანა, რადგან ეს გავლენას ახდენს სხვა ქვეყნებზე,” - აღნიშნა მსოფლიო სასურსათო პროგრამის ხელმძღვანელმა.
შეგახსენებთ, გაერო-სა და თურქეთის შუამავლობით გასული წლის ივლისში გაფორმებული მარცვლეულის შეთანხმებით უკრაინიდან მილიონობით ტონა მარცვლეულის ექსპორტი გახდა შესაძლებელი. შეთანხმებას ვადა 18 მაისს ეწურება და ის 120 დღით უნდა გახანგრძლივდეს, მაგრამ რუსეთი შეთანხმებიდან გასვლით იმუქრება. რუსეთის, უკრაინის, თურქეთისა და გაერო-ს მაღალი რანგის ოფიციალურმა პირებმა გუშინ სტამბულში შეხვედრა გამართეს, რათა განეხილათ წინადადებები შეთანხმების გახანგრძლივების შესახებ. შეხვედრის შედეგები, ჯერჯერობით, არ გასაჯაროვებულა.
