თბილისის სახელმწიფო უნივერსიტეტის საკალათბურთო გუნდმა „თსუ“ კვლავ გაიმარჯვა. უნივერსიტეტის გუნდმა მე-4 ნახევარფინალურ მატჩში ანგარიშით, 91:80 ზესტაფონის „მარგვეთი“დაამარცხა და საქართველოს სუპერლიგის ნახევარფინალური სერია ანგარიშით, 3:1 მოიგო.

ინფორმაციას თბილისის სახელმწიფო უნივერსიტეტი ავრცელებს.

მათივე ცნობით, მატჩის საუკეთესო კალათბურთელად თსუ-ელი გიორგი ცინცაძე დასახელდა.

„თსუ-ის გამარჯვებაში დიდი წვლილი მიუძღვით ერთგულ ქომაგებს. მთელი გადამწყვეტი შეხვედრის განმავლობაში უნივერსიტეტის გუნდს გულშემატკივართა მხურვალე მხარდაჭერა ამხნევებდა. გადამწყვეტ შეხვედრას თსუ-ს რექტორი ჯაბა სამუშია, ადმინისტრაციის ხელმძღვანელი ლაშა საღინაძე, სტუდენტები, პროფესორები, ადმინისტრაციის თანამშრომლები ესწრებოდნენ.

სუპერლიგის ჩემპიონობამდე თსუ-ს ერთი ნაბიჯი აკლია. ფინალურ შეხვედრაში იგი რუსთავის „რუსთავს“ დაუპირისპირდება.

უნივერსიტეტის საკალათბურთო გუნდისთვის მიმდინარე წელი წარმატებული აღმოჩნდა. ერთი თვის წინ თსუ საქართველოს თასის მფლობელი გახდა“, - აღნიშნულია გავრცელებულ ინფორმაციაში.