თბილისის საკრებულოს თავმჯდომარე, ვაკის რაიონის მაჟორიტარი დეპუტატი გიორგი ტყემალაძე, ამავე რაიონის გამგებელ დავით კვინიკაძესთან ერთად, ვაჟა-ფშაველას I კვარტალში მდებარე სკვერის სარეაბილიტაციო სამუშაოების მიმდინარეობას გაეცნო.

ინფორმაციას თბილისის საკრებულო ავრცელებს.

როგორც გიორგი ტყემალაძემ აღნიშნა, თბილისის ყველა უბანში შექმნილია სარეკრეაციო სივრცეები, სადაც სხვადასხვა ასაკის მოქალაქეებსა თუ მოზარდებს, მშვიდ გარემოში აქტიური დასვენება, განტვირთვა და გართობა შეუძლიათ.

„დასასვენებელი სივრცეების მოწყობა და არსებულის რეაბილიტაცია ჩვენი ერთ-პრიორიტეტია. სწორედ ამიტომ, რამდენიმე თვის წინ, ვაჟა-ფშაველას I კვარტალში მდებარე ირაკლი ციციშვილის სახელობის სკვერის რეაბილიტაცია დაიწყო. დღეს კი სამუშაოების მიმდინარეობას ადგილზე გავეცანით. შეხვდით ადგილობრივ მოსახლეობას და მათი წინადადებები და მოსაზრებები მოვისმინეთ“, - განაცხადა გიორგი ტყემალაძემ.

მისივე თქმით, თითქმის 2 ჰექტარ ფართობზე კეთილმოწყობილი სარეკრეაციო სივრცე გათვლილი იქნება სხვადასხვა ასაკისა და საჭიროების ადამიანებისთვის. მოსახლეობასთან მჭიდრო კომუნიკაციით კი, მთელი თბილისის მასშტაბით, რეკრეაციული პროექტების განხორციელება კვლავ გაგრძელდება.