თურქეთის პრეზიდენტობის ოპოზიციონერი კანდიდატი ქემალ ქილიჩდაროღლუ, რომელიც ექვსი ოპოზიციური პარტიის ალიანსს ხელმძღვანელობს, რუსეთს თურქეთის არჩევნებში ჩარევაში ადანაშაულებს.

ქილიჩდაროღლუ აცხადებს, რომ რუსეთი არჩევნებში გაყალბებული ვიდეოებისა და მასალების შეთხზვით ერევა.

„თუ გსურთ ჩვენი მეგობრობის გაგრძელება 15 მაისის შემდეგ, ხელები შორს თურქეთის სახელმწიფოსგან. ჩვენ კვლავ თანამშრომლობისა და მეგობრობის მომხრე ვართ”, - აღნიშნა ქემალ ქილიჩდაროღლუმ, რომელიც პრეზიდენტ რეჯეფ თაიფ ერდოღანის მთავარ კონკურენტად ითვლება.

კრემლის პრესსპიკერმა, დიმიტრი პესკოვმა ბრალდება უარყო და განაცხადა, რომ „თუ ვინმემ ბატონ ქილიჩდაროღლუს ასეთი ინფორმაცია მიაწოდა, ისინი მატყუარები არიან".

გუშინ, თურქეთის პრეზიდენტობის ერთ-ერთმა კანდიდატმა, მუჰარემ ინჯემ, საკუთარი კანდიდატურა მოხსნა და გადაწყვეტილების ერთ-ერთ მიზეზად სექსუალური ხასიათის ყალბი კადრები დაასახელა.

შეგახსენებთ, თურქეთში საპრეზიდენტო და საპარლამენტო არჩევნები 14 მაისს გაიმართება.