CNN - რუსეთმა უკრაინაში ამერიკული „პატრიოტის“ სარაკეტო სისტემის განადგურება სცადა

რუსეთმა, გასულ კვირას, უკრაინაში ამერიკული „პატრიოტის“ საჰაერო თავდაცვის სისტემის ჰიპერბგერითი რაკეტით განადგურება სცადა, - ინფორმაციას CNN-ი ორ ამერიკელ ოფიციალურ პირზე დაყრდნობით ავრცელებს.

მათივე ინფორმაციით, თავდასხმა უშედეგო აღმოჩნდა - უკრაინელმა სამხედროებმა რაკეტა „პატრიოტის“ სისტემის გამოყენებით მოიგერიეს.

CNN-ის ერთ-ერთი წყარო ხაზს უსვამს, რომ უკრაინელმა საჰაერო დამცველებმა რუსული რაკეტის მოსაგერიებლად „პატრიოტიდან“ სხვადასხვა კუთხით მრავალი რაკეტა გაისროლეს, რაც აჩვენებს, რომ ისინი სწრაფად დაეუფლნენ ამ მძლავრი სარაკეტო სისტემის გამოყენებას.

შეგახსენებთ, პენტაგონის პრესმდივანი გენერალმა პატრიკ რაიდერმა რამდენიმე დღის წინ დაადასტურა, რომ უკრაინელებმა „პატრიოტის“ სისტემის გამოყენებით რუსული ჰიპერბგერითი რაკეტა „კინჟალი“ ჩამოაგდეს.

ცნობისთვის, უკრაინას, საჰაერო თავდაცვის გასაძლიერებლად, სულ მცირე ორი „პატრიოტის“ სარაკეტო სისტემა აქვს მიღებული - ერთი შეერთებული შტატებიდან და ერთი გერმანიიდან.