პოლონეთმა, რუსეთის საზღვართან განსათავსებლად, მაღალი მობილობის საარტილერიო სარაკეტო სისტემის (HIMARS) პირველი პარტია მიიღო. ამის შესახებ დღეს პოლონეთის ვიცე-პრემიერმა და თავდაცვის მინისტრმა მარიუშ ბლაშჩაკმა განაცხადა.

"ეს იარაღი ჩვენი ქვეყნის ჩრდილო-აღმოსავლეთ ნაწილში, მე-16 მექანიზებულ დივიზიაში განთავსდება. მისი ამოცანა აგრესორის შეკავება, პოლონეთისა და ჩრდილო-ატლანტიკური ალიანსის აღმოსავლეთ ფლანგზე პოლონეთის არმიის გაძლიერება იქნება", - განაცხადა ბლაშჩაკმა.

როგორც მედია წერს, M142 HIMARS-ების მიღება 2019 წლის თებერვლის შეთანხმების ფარგლებში მოხდა.

პოლონეთის ვიცე-პრემიერისა და თავდაცვის მინისტრის თქმით, ოფიციალური ვარშავა HIMARS-ის კიდევ ერთი პარტიის მოწოდებასთან დაკავშირებით მოლაპარაკებებს აწარმოებს.