ნატოს ყველაზე გადაუდებელი ამოცანა რუსეთის ომში უკრაინის გამარჯვების უზრუნველყოფაა, - ამის შესახებ ჩრდილოატლანტიკური ალიანსის გენერალურმა მდივანმა იენს სტოლტენბერგმა „კოპენჰაგენის დემოკრატიის სამიტზე“ განაცხადა.
„ახლა, ყველაზე გადაუდებელი ამოცანა უკრაინის გამარჯვების უზრუნველყოფაა, რომ რუსეთის პრეზიდენტმა, პუტინმა არ მოიგოს ეს ომი“, - განაცხადა სტოლტენბერგმა.
ამასთან, ნატოს გენმდივანმა აღნიშნა, რომ ალიანსის ამოცანას წარმოადგენს ამ ომის უკრაინის ფარგლებს გარეთ ესკალაციის თავიდან აცილება.
„ჩვენ არ ვიცით, როგორ დასრულდება ეს ომი, თუმცა რაც ვიცით ისაა, რომ როდესაც ის დასრულდება, უაღრესად მნიშვნელოვანია, რომ ჩვენ შევძლოთ თავიდან ავიცილოთ ისტორიის გამეორება”, - განაცხადა ალიანსის ხელმძღვანელმა.
გარდა ამისა, უკრაინის ნატოში გაწევრიანებასთან დაკავშირებით, სტოლტენბერგმა განაცხადა, რომ „ყველა მოკავშირე თანხმდება, რომ უკრაინას აქვს უფლება აირჩიოს საკუთარი გზა“.
„მოსკოვის გადასაწყვეტი არაა, უკრაინას რისი გაკეთება შეუძლია“, - დასძინა სტოლტენბერგმა.