მაშინ როცა, უკრაინა, დასავლეთის მხარდაჭერით, მზად არის გადამწყვეტი იერიში მიიტანოს 21-ე საუკუნის უმთავრეს ბოროტებაზე, საქართველოს მთავრობა ცვლის ქვეყნის გეოპოლიტიკურ კურსს, - ამის შესახებ პარლამენტის პლენარულ სხდომაზე უფრაქციო პარლამენტის წევრმა, არმაზ ახვლედიანმა განაცხადა.

მისი თქმით, საქართველოს ხელისუფლება, ფაქტობრივად, ეუბნება სამყაროს, რომ მას აღარ სჭირდება დასავლეთი, საქართველოს ბუნებრივი სივრცე - ევროპა და ემზადება იმისთვის, რომ გაყალბებით, წინასაარჩევნო წნეხით ჩაატაროს მომავალი წლის არჩევნები და თუ ძალით მიიღო წარმატება, ფუნდამენტურად შეცვალოს საქართველოს კურსი ყველა მიმართულებით - გააუქმოს ინსტიტუციები, რომელიც მას აქამდე ხელს უშლიდა, გამოაცხადოს ნეიტრალიტეტი და ამოიღოს კონსტიტუციიდან 78- ე მუხლი.

„ბოლო ხანებში, რაც ხდება ქვეყანაში, ეს ყველაფერი მიუთითებს, რომ საქართველოში კარს მოგვადგა ცენზურა, იდეოლოგიური წნეხი და ყველაფერი ეს ხდება ერთადერთი მიზნით, რომ 2024 წლის არჩევნებში ხელისუფლებამ მიაღწიოს წამატებას", - აღნიშნა არმაზ ახვლედიანმა.