ინფრასტრუქტურის დაზიანების შესახებ მუნიციპალიტეტის ინფორმირების მიზნით შექმნილ აპლიკაციაში 180-ზე მეტი შეტყობინება შევიდა. ამის შესახებ დედაქალაქის მერმა, კახა კალაძემ დედაქალაქის მთავრობის სხდომაზე განაცხადა.
მისივე თქმით, მოსახლეობის მხრიდან აქტიურობა ძალიან მაღალია.
„როგორც იცით, გუშინ ახალი აპლიკაცია Fix Tbilisi ამოქმედდა. აღნიშნული აპლიკაცია გვაძლევს შესაძლებლობას, რომ იდენტიფიცირება გავუკეთოთ სხვადასხვა პრობლემურ საკითხს. იცით, რომ პირველ ეტაპზე 4 მიმართულება არის შერჩეული: საგზაო ინფრასტრუქტურის დაზიანება, ხე-მცენარეების დაზიანება, გარეგანათების დაზიანება და საპარკე ინფრასტრუქტურის დაზიანება. ძალიან მაღალი აქტიურობაა, უკვე 180-ზე მეტი შეტყობინებაა შემოსული, რაც ძალიან კარგია. მინდა მადლობა გადავუხადო ყველა იმ ადამიანს, ვინც ზრუნავს, რომ ჩვენი ქალაქი მოწესრიგებული იყოს. კონკრეტული ფაქტები, რაც, სამწუხაროდ, გვხვდება ვანდალიზმის სახით, ძალიან ცუდია. ამ ყველაფერს ერთად უნდა ვებრძოლოთ“, - აღნიშნა კალაძემ.
ცნობისთვის, Fix Tbilisi დედაქალაქში ინფრასტრუქტურის დაზიანების შესახებ მუნიციპალიტეტის ინფორმირების მიზნით შეიქმნა.