თბილისის საქალაქო სასამართლოში „გირჩი-მეტი თავისუფლების“ ლიდერების, ზურა ჯაფარიძისა და ნიკა მოსიაშვილის სასამართლო პროცესი გაიმართა.
დაცვის მხარემ სასამართლოს შუამდგომლობით მიმართა და მოსამართლის აცილება მოითხოვა, თუმცა მოსამართლემ მოთხოვნა არ დააკმაყოფილა.
„აცილებას ბევრი საფუძვლები ჰქონდა, მათ შორის, როგორ იქცეოდა პირველ სხდომაზე, როდესაც აშკარად ჩანდა, რომ სწრაფად უნდოდა გადაწყვეტილების მიღება. კლანის გაშვებას მაინც მივაღწევთ საბოლოო ჯამში. [მოსამართლის აცილებაზე] მაგარი პასუხი გაგვცა: „აზრი არ აქვს, მე რომც ამიცილოთ ისეთი მოსამართლე შეგხვდებათ, რომელიც იქ იყო, ყველა იქ ვიყავით, ყველა ვქეიფობდით“.
არის ვიდეოჩანაწერები, სადაც მთელი პერიმეტრი ჩანს და ამ საქმეში გვჭირდება. მოვითხოვეთ, იქნება აქაც მოგვაწოდონ. შსს 15 წუთი ჩხუბობდა, რომ არცერთ შემთხვევაში ეგ ჩანაწერები არ მოიტანოთო" ,- აღნიშნა ზურა ჯაფარიძემ.
თბილისის საქალაქო სასამართლოში „გირჩი-მეტი თავისუფლების“ ლიდერების, ზურა ჯაფარიძისა და ნიკა მოსიაშვილის მორიგი სასამართლო პროცესი 7 ივნისს გაიმართება.
ცნობისთვის, ზურაბ ჯაფარიძე და ნიკა მოსიაშვილი შსს-ს წარმომადგენლებმა 7 მარტს რუსთაველის გამზირზე მიმდინარე საპროტესტო აქციაზე დააკავა. მათ ადმინისტრაციულ სამართალდარღვევათა კოდექსის 166-ე და 173-ე მუხლებით ედავებიან, რაც წვრილმან ხულიგნობასა და პოლიციის კანონიერი მოთხოვნისადმი დაუმორჩილებლობას გულისხმობს.