"ნაციონალური მოძრაობის" დეპუტატი თინა ბოკუჩავა აცხადებს, რომ პრეზიდენტის ადმინისტრაციის მიერ გამოქვეყნებულ ინფორმაცია, რომლის თანახმად, მთავრობა ბრიუსელში ვიზიტზე პრეზიდენტს თანხმობას არ აძლევს, “ემსახურება ინსტიტუტების ჩამოშლას და ხელის შეშლას აქტორებისთვის, რომლებიც ცდილობენ, ქვეყანა კანდიდატის სტატუსამდე მიიყვანონ“.

მისი თქმით, "ქართული ოცნების" საგარეო კურსი შეიცვალა და ამას არ უარყოფს, მათ შორის, პრეზიდენტი.

“გახსოვთ, რომ წარსულშიც ჰქონდა ადგილი პრეზიდენტის საერთაშორისო ვიზიტების შეფერხებას. ეს არის მიზანმიმართული მცდელობა, რომ არ მისცენ პრეზიდენტს შესაძლებლობა განახორციელოს უფლებამოსილება საგარეო პოლიტიკის მიმართულებით, რაც მისი მნიშვნელოვანი კონსტიტუციური ფუნქციაა. ეს ბუნებრივია, ემსახურება ინსტიტუციების ჩამოშლას და ხელის შეშლას, რომ აქტორებმა, რომლებიც ცდილობენ ქვეყანა მიიყვანონ სტატუსამდე და შემდეგ ევროკავშირის წევრობამდე, ვერ განახორციელონ საკუთარი უფლებამოსილება.

პრეზიდენტმა ყოველგვარი ორაზროვნების გარეშე, მათ შორის პარლამენტშიც, ისაუბრა "ქართული ოცნების" ფერისცვალებაზე და იმაზე, რომ "ქართული ოცნების" საგარეო კურსი შეიცვალა და ღიად აიღეს კურსი რუსეთისკენ. ეს არის ფაქტი და ამას არ უარყოფს მათ შორის პრეზიდენტი, რომლის არჩევაშიც დიდი ძალისხმევა ჩადო "ქართულმა ოცნებამ",- განაცხადა ბოკუჩავამ.

პრეზიდენტი ბრიუსელში ვიზიტს გეგმავს, რასთან დაკავშირებითაც საქართველოს მთავრობისგან თანხმობას ელოდება.

როგორც პრეზიდენტის ადმინისტრაციაში აცხადებენ, შესაბამის საკითხზე პრეზიდენტმა მთავრობას 27 აპრილს მიმართა, თუმცა თანხმობა ამ დრომდე არ მიუღია.

„15 მაისს ძალში შევიდა პუტინის განკარგულება პირდაპირი ფრენების აღდგენის შესახებ. 15 მაისსვე საქართველოს მთავრობამ დაუყოვნებლივ გასცა თანხმობა.

27 აპრილს მთავრობამ მიიღო მიმართვა 31 მაისს პრეზიდენტის ბრიუსელში ვიზიტთან დაკავშირებით. საქართველოს მთავრობას ამ დრომდე თანხმობა არ გაუცია“, - აცხადებენ პრეზიდენტის ადმინისტრაციაში.