მულტიფუნქციურ სივრცე „თეატრში“ „ქართული შოუს“ პრემიერა გაიმართება

6 ივნისს, მულტიფუნქციურ სივრცე „თეატრში“ სტუმრები ახალ და უნიკალურ დადგმას იხილავენ. „ქართული შოუ“ – ასე ჰქვია წარმოდგენას, რომელიც ქართველ და უცხოელ სტუმრებს ქართულ კულტურასა და ისტორიას, საუკეთესო მუსიკალური და ქორეოგრაფიული ნიმუშებით გააცნობს. ამავე დროს, შესთავაზებს ვახშამსაც, რომელზეც წარმოდგენილი იქნება ქართული სამზარეულოს გამორჩეული კერძები და ავთენტური გემოები.

„ქართულ შოუში“ მონაწილეობას იღებენ წამყვანი არტისტები და ქართული ნაციონალური ბალეტი „სუხიშვილები“. „თეატრში“ ცოცხლად გაჟღერდება „შენ ხარ ვენახი“, „ჩაკრულო“, „მრავალჟამიერი“, „მუხამბაზი“ და სხვა ქართული ხალხური და კლასიკური სიმღერები. „სუხიშვილები“ კი სტუმრებს ქორეოგრაფიის საუკეთესო ნიმუშებს წარუდგენს. დადგმისთვის ტექსტები საგანგებოდ შექმნა მწერალმა აკა მორჩილაძემ.

„ქართული შოუ“ გაფორმდება აუდიოვიზუალური ინსტალაციებით და სტუმრებს საქართველოში მოგზაურობის ახლებურ და უნიკალურ გამოცდილებას შესთავაზებს.

„თეატრის“ კონცეფციიდან გამომდინარე, ვცდილობთ, სტუმრებს წარვუდგინოთ ის, რაც ჩვენი კულტურის ნაწილი და იდენტობის მაჩვენებელია. ეს ხაზი გასდევს ყველა ჩვენს დადგმას, მიუხედავად ჟანრისა. „ქართული შოუ“ კი ჩვენი კულტურის ყველა მიმართულებას – ქორეოგრაფიას, ფოლკლორს, მრავალხმიან სიმღერებს, კლასიკურ მუსიკასა თუ სამოსს ერთ სივრცეში აერთიანებს და საქართველოზე ახლებურად ჰყვება“, – ამბობს „თეატრის“ სამხატვრო ხელმძღვანელი და „ქართული შოუს“ დამდგმელი რეჟისორი, ზაალ ჩიქობავა.

წარმოდგენა სამ მოქმედებად გაიმართება, თითოეული ნაწილის დასრულების შემდეგ სტუმრებს კერძებით გაუმასპინძლდებიან.

„ქართულ შოუში“ ვახშამს ძალიან დიდი დატვირთვა აქვს, რადგან საქართველოს სრულფასოვნად გაცნობა ჩვენი ქვეყნის უნიკალური სამზარეულოს გარეშე წარმოუდგენელია. კერძები, ტრადიციულად, ამ დღისთვის საგანგებოდ შეირჩევა და თანამედროვე სახე მიეცემა“, – ამბობს „თეატრის“ ბრენდ-შეფი, ალექს ნათაძე.

„ქართული შოუს“ ბილეთების შესაძენად გადადით ბმულზე, დეტალური ინფორმაციისთვის კი, ეწვიეთ „თეატრის“ ფეისბუქ გვერდს.

ინფორმაციას „წისქვილი ჯგუფი“ ავრცელებს.