თუ კომისია შეიქმნება, „ქართული ოცნების“ რამდენიმე წევრის „ქოლ-ცენტრი“ გამომჟღავნდება, მათ შორის ისეთების, რომლებსაც აქვთ ბევრი უძრავი ქონება საქართველოში, - ამის შესახებ „სტრატეგია აღმაშენებლის“ დეპუტატმა პაატა მანჯგალაძემ ჟურნალისტებთან განაცხადა.

როგორც მან აღნიშნა, შესაძლოა, „ქოლ-ცენტრებზე“ საგამოძიებო კომისიის შექმნის საკითხი დღეს გავიდეს სხდომაზე, ამიტომ ოპოზიცია მობილიზებული უნდა იყოს.

„როგორც კომისიის შექმნის ინიციატორი ბექა ლილუაშვილი ამბობს, ჰქონდა კომუნიკაცია პარლამენტის თავმჯდომარესთან და თავმჯდომარემ დაადასტურა, რომ დღეს, 12:00-ის შემდეგ დაიწყება ამ კომისიის შექმნის საკითხის განხილვა, ამიტომ ჩვენ უნდა ვიყოთ მობილიზებული. „ქართული ოცნების“ პირობებში გაურკვეველი და ამოუცნობია ყოველთვის, როდის არის კენჭისყრა - თუ ვიქნებით 49 იქნება კენჭისყრა, თუ 50 ვიქნებით, არ ჩაატარებს კენჭისყრას „ქართული ოცნება“, რომ უცაბედად კომისია არ შევქმნათ. ეშინიათ საგამოძიებო კომისიის, როგორც ისკო დასენზე მივიდა კვალი ხუთდღიანი საგამოძიებო პროცესის, როცა საგამოძიებო კომისიის სახით მექანიზმი ჩაირთვება, ხომ წარმოგიდგენიათ, „ოცნების“ რამდენი წევრის "ქოლ ცენტრი" გამომჟღავნდება. პირდაპირ გეუბნებით გამომჟღავნდება „ქართული ოცნების“ რამდენიმე წევრის „ქოლ - ცენტრი“, მათ შორის ისეთების, რომლებსაც აქვთ ბევრი უძრავი ქონება საქართველოში”, - განაცხადა მანჯგალაძემ.