არ ვიცი, „ნაციონალურ მოძრაობას“ რა პიარ-სვლები აქვს ჩაფიქრებული - ერთი რამ ცხადია, რომ ბოლო წლების განმავლობაში შიდა დაპირისპირება იკვეთება,- ამის შესახებ „ქართული ოცნების“ გენერალურმა მდივანმა, დედაქალაქის მერმა კახა კალაძემ ჟურნალისტებს განუცხადა, რითაც გამოეხმაურა ინფორმაციას იმის თაობაზე, რომ „ნაციონალურმა მოძრაობამ“ შესაძლოა, მომავალი არჩევნებისთვის მიხეილ სააკაშვილი პრემიერ-მინისტრობის კანდიდატად დაასახელოს.

მისი თქმით, სააკაშვილს კონკრეტულ საქმეებზე ბრალი მიუძღვის, რის გამოც ის სასჯელს იხდის.

„მიხეილ სააკაშვილი დამნაშავეა. ის სასჯელს არა საპატიმროში, არამედ კლინიკაში იხდის. არ ვიცი, „ნაციონალურ მოძრაობას“ რა პიარ-სვლები აქვს ჩაფიქრებული. თავად იღებენ გადაწყვეტილებას, რა ფორმით უნდა მოემზადონ არჩევნებისთვის. ერთი რამ ცხადია, ბოლო წლების განმავლობაში შიდა დაპირისპირება იკვეთება. ეს აშკარაა, ვხედავთ ტელევიზიებში ერთმანეთის მიმართ რა განცხადებებს აკეთებენ. რაც შეეხება მიხეილ სააკაშვილს, ის არის კონკრეტულ საქმეებზე დამნაშავე და სასჯელს იხდის“, - განაცხადა კახა კალაძემ.