ანა ნაცვლიშვილის განცხადებით, მხოლოდ თბილისის მასშტაბით, ზოგიერთი სკოლის რეაბილიტაცია/მშენებლობის გამო, მოსწავლეების ალტერნატიულ სკოლაში ტრანსპორტირება სახელმწიფოს 13 მლნ ლარი უჯდება

„ლელოს“ დეპუტატის, ანა ნაცვლიშვილის განცხადებით, მხოლოდ თბილისის მასშტაბით, ზოგიერთი სკოლის რეაბილიტაცია/მშენებლობის გამო, მოსწავლეების ალტერნატიულ სკოლაში ტრანსპორტირება სახელმწიფოს 13 მლნ ლარი უჯდება.

როგორც ნაცვლიშვილმა პარლამენტში, განათლების მინისტრის ინტერპელაციის წესით მოსმენაზე სიტყვით გამოსვლისას განაცხადა, რიგ შემთხვევებში მშენებელი კომპანიების მიერ რეაბილიტაციის პროცესი გაჭიანურებულია, რის გამოც სახელმწიფოს მხრიდან მონიტორინგია საჭირო. მისივე თქმით, შესაძლოა, კორუფციულ ინტერესებთან დაკავშირებით კითხვები გაჩნდეს.

„მარტო თბილისში 1 წლის განმავლობაში ასეთი ტრანსპორტირება სახელმწიფოს 13 მილიონი უჯდება. მგონი, ეს კოლოსალური თანხაა. 13 მილიონი გვიჯდება თუ არა მართლა? თუ ეს არასწორი მონაცემია, გთხოვთ, ჩაშლილად მოგვაწოდოთ, რამდენს ვიხდით ამ ტრანსპორტირებისთვის. არ ვამბობ, რომ ტრანსპორტირება არ უნდა იყოს, მაგრამ ერთი მხრივ სერიოზულ თანხას ვიხდით ტრანსპორტირებაში, ამ დროს რეაბილიტაციის პროცესი გაჭიანურებულია, არაეფექტური მონიტორინგია. თუ მშენებელ კომპანიებს ძალიან მკაცრი კონტროლი არ დაუდგინდებათ და არ ვეტყვით, რომ წამმზომი გაქვთ ჩართული, მაშინ თვითონ დააფინანსონ ეს ტრანსპორტირება, ჩაიდოს ეს ხელშეკრულებაში. სახელმწიფომ რატომ უნდა იხადოს ეს თანხა იმის გამო, რომ დიდი ალბათობით, სატენდერო კომისიის მხრიდან რომელიღაც მშენებლის შესაძლებლობები, დროულად და ხარისხიანად ჩაებარებინა სამუშაოები, არ ყოფილა გამოკვლეული. რას აკეთებს სატენდერო კომისია, თუ მის მიერ შერჩეული კომპანიები სისტემურად აგვიანებენ ხარისხიანი და დროული სამუშაოების გაწევას. ამიტომ, ან წამმზომი ჩავურთოთ ამ კომპანიებს (მათ სერიოზული ზედამხედველობა სჭირდებათ), ან რაიმე სხვა გამოსავალია აქ მოსაძებნი, რადგან ძალიან სერიოზული კითხვები შეიძლება დაისვას, ამ შეთანხმების უკან ხომ არ არის რაიმე კორუფციული ინტერესი?“,- განაცხადა ანა ნაცვლიშვილმა.

ლევან ლორთქიფანიძე - აღმასრულებელი და საკანონმდებლო ორგანოების საგარეო პოლიტიკა არ არის აცდენილი ერთმანეთს - დარწმუნებული ვარ, ვენეციის კომისიის რეკომენდაციების უარყოფის გადაწყვეტილება ირაკლი კობახიძის გარეშე არ მიღებულა
ქართული პრესის მიმოხილვა 26.02.2024
გამორჩეული სიახლე - ახალი HONOR X8b სმარტფონის განხილვა
ჰიუნდაი ავტო საქართველოში შერჩეულ მოდელებზე მწარმოებლის ბონუსს მიიღებთ
ტერაბანკის პარტნიორობით, ილიას სახელმწიფო უნივერსიტეტში პრე-აქსელერაციის პროგრამა დასრულდა
ამერიკის შეერთებული შტატების ელჩი საქართველოს უნივერსიტეტს ესტუმრა
მსოფლიოს წამყვანი ტექნოლოგიური კომპანიის, Salesforce-ის ოფიციალური წარმომადგენელი და პარტნიორი კომპანია INSPARK, საქართველოში იწყებს ოპერირებას