რა არის ცუდი იმაში, თუ რუსეთთან პირდაპირი ფრენები იქნება? - ამის შესახებ თბილისის მერმა, კახა კალაძემ ჟურნალისტებს განუცხადა.

მისივე შეფასებით, ფრენებთან დაკავშირებით ოპოზიციის პოზიცია სპეკულაციურია.

„სპეკულაციებია ეს, ჩვეულებრივი ფარისევლები არიან, ჩვენ ხომ გვახსოვს მათი განცხადებები, იგივე ტურისტების შემოსვლასთან დაკავშირებით, რა არის ცუდი ამაში, თუ პირდაპირი ფრენები იქნება?! თუ ადამიანი ერევნის ან სხვა ქვეყნის გავლით ჩვეულებრივ შემოდიოდა საქართველოში, ახლა თუ პირდაპირი ფრენით შემოვა, ცუდი რა არის ამაში? ჩვენ ხომ ვსაუბრობთ იმაზე, რომ ძალიან ბევრი ქართველი ცხოვრობს რუსეთის ფედერაციაში. თუ მათ ექნებათ შესაძლებლობა, პირდაპირ ჩამოვიდნენ საქართველოში, ცუდი რა არის ამაში?"-განაცხადა კალაძემ.

მისივე განმარტებით, მთავარია, ქვეყანაში შემოსულ მოქალაქეს „ოკუპაციის შესახებ კანონი“ დარღვეული არ ჰქონდეს.

„შესაბამისად, თუ აღნიშნული კანონი დარღვეული არ არის, ნებისმიერ ადამიანს შეუძლია შემოვიდეს, თუ ძებნაში არ არის", - განაცხადა კალაძემ.