ქართველი ძიუდოისტის, მსოფლიო ჩემპიონის ლუკა მაისურაძის სახლი ხაშურში ჯერჯერობით დაუდგენელმა პირებმა გაქურდეს.

როგორც „ინტერპრესნიუსს“ შინაგან საქმეთა სამინისტროში განუცხადეს, მომხდარ ფაქტზე გამოძიება სისხლის სამართლის კოდექსის 177-ე მუხლით მიმდინარეობს (ქურდობა - ჩადენილი ბინაში უკანონო შეღწევით).

ქართველი ძიუდოისტი ლუკა მაისურაძე დოჰაში ერთი კვირის წინ გამართულ მსოფლიო ჩემპიონატზე პირველ ადგილს დაეუფლა. მსოფლიო ჩემპიონობამდე მაისურაძე 2022 წლის ევროპის ჩემპიონია ძიუდოში, ასევე ახალგაზრდებს და ჭაბუკებს შორის ძიუდოსა და სამბოში არაერთი მედლის მფლობელია.