საქართველოს სავაჭრო პალატისა და აზერბაიჯანის მცირე და საშუალო ბიზნესის განვითარების სააგენტოს ხელმძღვანელებმა სავაჭრო-ეკონომიკური ურთიერთობების გაღრმავების პერსპექტივებზე იმსჯელეს
საქართველოს სავაჭრო პალატისა და აზერბაიჯანის მცირე და საშუალო ბიზნესის განვითარების სააგენტოს ხელმძღვანელებმა ქვეყნებს შორის სავაჭრო-ეკონომიკური ურთიერთობების გაღრმავების პერსპექტივებზე იმსჯელეს.
საქართველოს სავაჭრო პალატის ინფორმაციით, შეხვედრისას, პალატის პრეზიდენტმა გიორგი პერტაიამ და აზერბაიჯანის მცირე და საშუალო ბიზნესის განვითარების სააგენტოს საბჭოს თავმჯდომარემ ორჰან მამადოვმა აზერბაიჯანსა და საქართველოში ბიზნესის განვითარების ხელშეწყობის მზადყოფნა გამოთქვეს.
„შეხვედრის მთავარი თემა იყო ორ ქვეყანას შორის სავაჭრო-ეკონომიკური ურთიერთობების გაღრმავების პერსპექტივები და მიმდინარე წლის 2 ივნისს, თბილისში დაგეგმილი საქართველო-აზერბაიჯანის ბიზნეს ფორუმი.
მხარეებმა განიხილეს მჭიდრო თანამშრომლობის ხელშეწყობის მექანიზმები და ურთიერთობების გაღრმავება ორ ორგანიზაციას შორის.
გამოითქვა მზადყოფნა აზერბაიჯანსა და საქართველოში ბიზნეს ფორუმების ორგანიზების, რათა წახალისდეს პირდაპირი კავშირების დამყარება მეწარმეებსა და ინვესტორებს შორის.
მსგავსი ტიპის შეხვედრები კიდევ უფრო გააძლიერებს ეკონომიკურ კავშირებს და გახსნის ახალ გზებს ნაყოფიერი თანამშრომლობისთვის”, - აღნიშნულია ინფორმაციაში.
