საკრებულოს ოპოზიციონერი წევრები - საბა ბუაძე და ანა გოგოლაძე თბილისის მერს, კახა კალაძეს შესაძლო კორუფციულ გარიგებაში ადანაშაულებენ და გამოძიების დაწყებას მოითხოვენ.

მათ თბილისის პროკურატურასთან ბრიფინგი გამართეს და განაცხადეს, რომ „ქართულ ოცნებასთან“ დაახლოებულმა დეველოპერმა წინასწარი განზრახვით, მინიმალურ ფასად შეისყიდა სატყეო ზონის მქონე მიწები, სადაც მშენებლობა არის აკრძალული და დაუყოვნებლივ მიმართა დედაქალაქის მერიას აღნიშნული მიწების მონაცვლეობის მოთხოვნით. საბა ბუაძის და ანა გოგოლაძის განმარტებით, წინასწარ დაგეგმილ და ორგანიზებულ სქემას დედაქალაქის ბიუჯეტის ასეულობით ათასი ლარი მოხმარდა.

„დღეს თბილისის პროკურატურას მივმართავთ მოთხოვნით, დაიწყოს გამოძიება თბილისის მერის განკარგულებასთან დაკავშირებით, რომელიც მიწების მონაცვლეობას და შესაძლო კორუფციულ გარიგებას ეხება, რომელიც წლების განმავლობაში „ქართული ოცნების“ ნაცად პრაქტიკად იქცა. კერძოდ, გასულ წელს საქმეში არსებულმა ნომინალურმა ფიგურამ, რომლის უკან დგას „ქართულ ოცნებასთან“ დაახლოებული დეველოპერი, მიზანმიმართულად, წინასწარი განზრახვით, მინიმალურ ფასად შეისყიდა სატყეო ზონის მქონე მიწები, სადაც მშენებლობა არის აკრძალული და დაუყოვნებლივ მიმართა დედაქალაქის მერიას აღნიშნული მიწების მონაცვლეობის მოთხოვნით. მან მოითხოვა ლისის მიმდებარედ ბევრად ძვირადღირებული ტერიტორია. დედაქალაქის მერმა აღნიშნულ პირს მიწა უყოყმანოდ მოუნაცვლა 2-ჯერ უფრო დიდ და ძვირადღირებულ ტერიტორიაში. შესაძლო წინასწარ დაგეგმილ და ორგანიზებულ სქემას მოხმარდა დედაქალაქის ბიუჯეტის ასეულობით ათასი ლარი და შესაბამისად, დედაქალაქმა ასეულობით ათასი ლარი იზარალა“, - განაცხადა გოგოლაძემ.

„ლელოს“ წევრის, საბა ბუაძის განცხადებით კი, საქმე ეხება სავარაუდო დანაშაულს, რომელიც გამოძიებას საჭიროებს.

„ჩვენ დღეს მივმართავთ პროკურატურას გამოძიების დაწყების მოთხოვნით იმ ძალიან თვალნათელ და აღვირახსნილ კორუფციულ მმართველობასთან დაკავშირებით, რომელიც თბილისის მერიაში არის გაბატონებული და რომლის შედეგადაც ყოველთვიურად, სისტემატურად ნიავდება თბილისელების საკუთრებაში არსებული ქონება. ამ შემთხვევაშიც, კალაძესთან, თბილისის მერიასთან დაახლოებულ ბიზნესმენებს ფიქტიური გარიგებების საშუალებით გადაეცემათ ჩვენ საკუთრებაში არსებული მიწა და ამის ხარჯზე ხდება დედაქალაქის დამატებით დამახინჯება, იქ კორპუსების აშენება თან ისე, რომ ქალაქს უკვე ასიათასი ლარის ღირებულების ზარალი ადგება“, - განაცხადა ბუაძემ.