თუ ირანი უარს იტყვის დიპლომატიის გზაზე, მაშინ, როგორც პრეზიდენტმა ბაიდენმა არაერთგზის განაცხადა, ყველა ვარიანტი განიხილება, იმის უზრუნველსაყოფად, რომ ირანმა ბირთვული იარაღი არ მოიპოვოს, - ამის შესახებ აშშ-ის სახელმწიფო მდივანმა, ენტონი ბლინკენმა განაცხადა.
ბლინკენის თქმით, აშშ-ის ვალდებულება, დაიცვას ისრაელი ურყევია.
როგორც სახელმწიფო მდივანმა აღნიშნა, ირანის რეჟიმი ყოველდღიურად ემუქრება ისრაელს რუკიდან წაშლით და საფრთხეს უქმნის მთელი ახლო აღმოსავლეთის რეგიონის უსაფრთხოებას.
ბლინკენის თქმით, ირანს, რუსეთის ძალების დრონებით შეიარაღების სანაცვლოდ, მოსკოვი დახვეწილ იარაღს აწვდის.
როგორც აშშ-ის სახელმწიფო მდივანმა აღნიშნა, თეირანის მიერ მოსკოვისთვის მიწოდებული უპილოტო საფრენი აპარატები რუსეთის მიერ უკრაინის მშვიდობიანი მოსახლეობის მოსაკლავად და ქვეყნის ინფრასტრუქტურის გასანადგურებლად გამოიყენება.
