„ნაციონალური მოძრაობა“ „ჯორჯიან მანგანეზსა“ და ხელისუფლებას მოუწოდებს, გაითვალისწინონ ჭიათურაში გაფიცულთა სამართლიანი მოთხოვნები და 3382 მაღაროელის მდგომარეობა. ამის შესახებ ინფორმაციას „ნაციონალური მოძრაობის“ პრესსამსახური ავრცელებს.

„ნაციონალური მოძრაობის“ წევრის, გიორგი კაპანაძის განცხადებით, ასობით ოჯახი შესაძლოა შემოსავლის გარეშე დარჩეს, თუ ხელისუფლება გარკვეულ ნაბიჯებს არ გადადგამს.

„3382 მაღაროელი მძიმე დღეშია. მათი ერთი ნაწილი ნახევრად უმუშევარი დარჩა, ხოლო მეორე ნაწილს შემცირება ემუქრება. უსამართლო და უგულო დამოკიდებულების გამო, ჭიათურელი მაღაროელები იძულებულნი გახდნენ გაფიცულიყვნენ.

ხელისუფლება, რომელიც დროებითი მმართველის მეშვეობით კომპანიას მართავს, ნაცვლად იმისა, რომ გაფიცულთა უფლებები დაიცვას, ყველაფერს აკეთებს იმისათვის, რომ მაღაროელები დაამციროს და დაჩაგროს.

„ერთიანი ნაციონალური მოძრაობა“, მხარდაჭერასა და სოლიდარობას ჭიათურელ მაღაროელებს უცხადებს, რომლებიც საკუთარ სიცოცხლეს რისკავენ იმისათვის, რომ ქვეყნის ეკონომიკას დაეხმარონ და ოჯახები გამოკვებონ.

„ნაციონალური მოძრაობა“ „ჯორჯიან მანგანეზსა” და ხელისუფლებას მოუწოდებს, გაითვალისწინონ გაფიცულთა სამართლიანი მოთხოვნები და 3382 მაღაროელის მდგომარეობა. ჭიათურაში, სადაც ისედაც უმძიმესი სოციალური ფონია, ასობით ოჯახი შესაძლოა შემოსავლის გარეშე დარჩეს - საბანკო მონოპოლიების პირისპირ, რაზეც პასუხისმგებლობა ოლიგარქიულ კლანს დაეკისრება, რომელიც ჭიათურის მაღაროებს აკონტროლებს და ასეულობით მილიონი დოლარის მოგებას ითვლის“, - განაცხადა გიორგი კაპანაძემ.