საქართველოს განათლებისა და მეცნიერების მინისტრმა, გიორგი ამილახვარმა ლიეტუვის რესპუბლიკის ელჩთან საქართველოში ანდრიუს კალინდრასთან სამუშაო შეხვედრა გამართა. ინფორმაციას განათლებისა და მეცნიერების სამინისტრო ავრცელებს.

მათივე ცნობით, მინისტრმა ლიეტუვის მხარეს საქართველოს მხარდაჭერისთვის მადლობა გადაუხადა.

„საუბარი ქვეყნებს შორის განათლებისა და მეცნიერების მიმართულებით არსებული და სამომავლო თანამშრომლობის გეგმებს შეეხო.

გიორგი ამილახვარმა ანდრიუს კალინდრასთან საქართველოსა და ლიეტუვის უნივერსიტეტებსა და სამეცნიერო საზოგადოებას შორის მჭიდრო თანამშრომლობისა და ერთობლივი აკადემიური პროგრამების განხორციელების საკითხები განიხილა.

მხარეები შეთანხმდნენ, რომ საქართველოსა და ლიეტუვას შორის არსებული 30-წლიანი დიპლომატიური ურთიერთობების აღსანიშნავად, ქართულ-ლიეტუვური ლექსიკონი გამოიცემა,“ - აღნიშნულია ინფორმაციაში.