ცესკოს თავმჯდომარე სახალხო დამცველს შეხვდა
ცენტრალური საარჩევნო კომისიის (ცესკო) თავმჯდომარე გიორგი კალანდარიშვილი სახალხო დამცველს ლევან იოსელიანს შეხვდა. ინფორმაციას ცესკო ავრცელებს.
მათივე ცნობით, შეხვედრაზე მხარეებმა შეზღუდული შესაძლებლობების მქონე პირთა საარჩევნო უფლების რეალიზების, ამ მიმართულებით ცესკოს მიერ განხორციელებული საქმიანობებისა და სახალხო დამცველის რეკომენდაციების შესრულების საკითხებზე იმსჯელეს.
დღეს გამართულ შეხვედრაზე ცესკოს თავმჯდომარემ ცესკოში არსებული სამუშაო ჯგუფების საქმიანობის შესახებ ისაუბრა. გიორგი კალანდარიშვილმა აღნიშნა, რომ სახალხო დამცველის წარმომადგენლები აქტიურად არიან ჩართული როგორც შშმ პირთა, ისე ეთნიკური უმცირესობების საკითხებზე მომუშავე ჯგუფების საქმიანობაში.
გიორგი კალანდარიშვილმა ომბუდსმენს ის სიახლეებიც გააცნო, რომელიც საარჩევნო პროცესში ელექტრონული ტექნოლოგიების დანერგვას უკავშირდება.
„ძალიან საინტერესო შეხვედრა გაიმართა სახალხო დამცველთან. ჩვენ ვისაუბრეთ სახალხო დამცველის მიერ გაცემული რეკომენდაციების შესრულებაზე. ასევე, მას მივაწოდე ინფორმაცია ყველა იმ მნიშვნელოვანი აქტივობის შესახებ, რომელიც შეზღუდული შესაძლებლობების მქონე პირთა უფლებების რეალიზაციასა და ცესკოს მხრიდან სათანადო სერვისების შეთავაზებას უკავშირდება. ასევე, ვისაუბრეთ სამომავლო თანამშრომლობის გაღრმავების პერსპექტივებზე“, - აღნიშნა გიორგი კალანდარიშვილმა.
სახალხო დამცველის, ლევან იოსელიანის განცხადებით, ადამიანის უფლებათა პერსპექტივის თვალსაზრისით, ძალიან მნიშვნელოვანია, რომ შეზღუდული შესაძლებლობების პირების ნების გამოვლენა საარჩევნო უბანზე გარანტირებული იყოს და მათ ეს ყოველგვარი დაბრკოლების გარეშე შეძლონ.
„მნიშვნელოვანია, გარემო იყოს ადაპტირებული, სადაც ისინი არჩევნებში სრულფასოვან მონაწილეობას შეძლებენ. ეს არის ძირითად საკითხი, რომელზეც ჩვენ გვაქვს გადაკვეთა ცესკოსთან და ეს საკითხი განვიხილეთ“, - განაცხადა ლევან იოსელიანმა.
ცესკოს თავმჯდომარისა და ომბუდსმენის შეხვედრა დღეს ცენტრალურ საარჩევნო კომისიაში გაიმართა.
