საქართველოს თავდაცვის ძალების მეთაური ვიზიტით რუმინეთში იმყოფებოდა

საქართველოს თავდაცვის ძალების მეთაური, გენერალ-მაიორი გიორგი მათიაშვილი ვიზიტით რუმინეთში იმყოფებოდა.

აღნიშნულთან დაკავშირებით ინფორმაციას თავდაცვის სამინისტრო ავრცელებს.

უწყების ცნობით, მხარეებმა რეგიონული უსაფრთხოების საკითხები და არსებული გამოწვევები მიმოიხილეს.

„გენერალ-მაიორი გიორგი მათიაშვილი რუმინეთის ეროვნული თავდაცვის მინისტრს ანჯელ ტილვარსა და შეიარაღებული ძალების თავდაცვის შტაბის უფროსს, გენერალ დანიელ პეტრესკუსს შეხვდა. თავდაცვის ძალების მეთაურმა რუმინულ მხარეს მადლობა გადაუხადა საქართველოს ტერიტორიული მთლიანობისა და სუვერენიტეტის, ევროპული და ევროატლანტიკური ინტეგრაციის ურყევი მხარდაჭერისთვის. აღინიშნა, რომ რუმინეთი საქართველოს სტრატეგიული პარტნიორი და ახლო მეგობარი ქვეყანაა, რასაც მოწმობს ქვეყნებს შორის გაფორმებული სტრატეგიული პარტნიორობის შეთანხმება, ხოლო თავდაცვის მინისტრების მიერ ხელმოწერილი თავდაცვის სფეროში თანამშრომლობის შესახებ განახლებული ხელშეკრულება.

მხარეებმა რეგიონული უსაფრთხოების საკითხები და არსებული გამოწვევები მიმოიხილეს. ასევე, განსაკუთრებული ადგილი დაეთმო შავი ზღვის უსაფრთხოების თემას. საუბარი შეეხო ნატო-სთან და ევროკავშირთან თანამშრომლობის არსებულ მექანიზმებსა და თავდაცვის შესაძლებლობების გაძლიერების მიზნით განხორციელებულ რეფორმებს. აღინიშნა ნატო-საქართველოს არსებითი პაკეტის (SNGP) მნიშვნელოვანი როლი და პაკეტის ინიციატივების წარმატებით განხორციელებაში რუმინეთის წვლილი. განსაკუთრებული ყურადღება დაეთმო ქვეყნებს შორის თავდაცვის სფეროში ორმხრივი თანამშრომლობის მიმდინარე საკითხებსა და სამომავლო გეგმებს, მათ შორის, სამხედრო განათლების მიმართულებას და ერთობლივ წვრთნებში მონაწილეობას.

ვიზიტის ფარგლებში, თავდაცვის ძალების მეთაური მრავალეროვნული სწავლების Dacian Strike 23 - ის საჩვენებელ სწავლებასაც დაესწრო”, - ნათქვამია თავდაცვის სამინისტროს მიერ გავრცელებულ ინფორმაციაში.

ნატა საბანაძე -  ჩვენი კანონი იმიტომაა „რუსული“, რომ ის ებრძვის დასავლეთს და მის მხარდაჭერას, მისი სამიზნე დასავლეთია, „ქართული ოცნება“, რუსეთის მსგავსად აღიარებს, რომ დასავლეთი მისი მტერია
ლევან დოლიძე - იმ ნაბიჯებზე ფოკუსირების ნაცვლად, რამაც უკვე შემდგომი პროგრესი უნდა მოგვიტანოს, ჩვენ თავად ვქმნით ახალ ბარიერებს ევროკავშირისკენ მიმავალ გზაზე
ქართული პრესის მიმოხილვა 15.04.2024
წინანდლის მამულში საგაზაფხულო სეზონი კულტურული ღონისძიებებით გაიხსნა