გლობალური გარემოსდაცვითი ფონდის მხარდაჭერით, ახალი პროექტი  „საწარმოო და გადამმუშავებელ სექტორში სამრეწველო მდგრადი ორგანული დამაბინძურებლების შემცირება ცირკულარულ ეკონომიკაზე გადასვლის მხარდაჭერის გზით“ იწყება

საქართველოს გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი გლობალური გარემოსდაცვითი ფონდის (GEF) დაფინანსებული პროექტის „საწარმოო და გადამამუშავებელ სექტორში სამრეწველო მდგრადი ორგანული დამაბინძურებლების შემცირება ცირკულარულ ეკონომიკაზე გადასვლის მხარდაჭერის გზით“ წარდგენას დაესწრო. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ინფორმაციით, პროექტს გაეროს ინდუსტრიული განვითარების ორგანიზაცია (UNIDO) და კავკასიის რეგიონული გარემოსდაცვითი ცენტრი (REC Caucasus) გარემოს დაცვისა და სოფლის მეურნეობის სამინისტროსთან თანამშრომლობით განახორციელებენ.

„აღნიშნული პროექტი განსაკუთრებით საინტერესო და მნიშვნელოვანია, რადგან, ერთი მხრივ, მოხდება მდგრადი ორგანული დამაბინძურებლების შემცირება სამრეწველო სექტორში ცირკულარული ეკონომიკის პრინციპებზე დაყრდნობით, ხოლო მეორე მხრივ, დაგვეხმარება ევროკავშირთან ასოცირების შეთანხმებით აღებული ვალდებულებების შესრულებაში. პროექტის ფარგლებში, შემუშავდება მიდგომები, თუ როგორ უნდა შემცირდეს ორგანული დამაბინძურებლების იმპორტი, განთავსება და ადგილზე შენახვა, რათა მაქსიმალურად გახანგრძლივდეს სასიცოცხლო ციკლი. აღნიშნული მნიშვნელოვანია, რადგან საშიში ქიმიური დამაბინძურებლების გაფრქვევა უარყოფით გავლენას ახდენს როგორც ადამიანის ჯანმრთელობაზე, ასევე გარემოზე. პროექტი კომპლექსურია, რამდენიმე მიმართულებას მოიცავს და ვფიქრობ, ქვეყნისთვის ძალიან პოზიტიური შედეგების მომტანი იქნება“, - აღნიშნა სოლომონ პავლიაშვილმა.

გარემოს დაცვისა და სოფლის მეურნეობის სამინისტროს ცნობით, პროექტი „საწარმოო და გადამამუშავებელ სექტორში სამრეწველო მდგრადი ორგანული დამაბინძურებლების შემცირება ცირკულარულ ეკონომიკაზე გადასვლის მხარდაჭერის გზით“ მიზნად ისახავს პოლიტიკის და არსებული საკანონმდებლო ჩარჩოს გაძლიერებას საწარმოო და გადამმუშავებელ სექტორში მდგრადი ორგანული დამაბინძურებლების პრევენციის მიზნით. პროექტის ფარგლებში მოხდება საწარმოო/გადამამუშავებელი სექტორის მხარდაჭერა მდგრადი ორგანული დამაბინძურებლების შესამცირებლად საუკეთესო ხელმისაწვდომი ტექნოლოგიებისა და გარემოსდაცვითი პრაქტიკის დანერგვის გზით, ასევე შესაძლებლობებისა და ცოდნის გაძლიერებით. განხორციელდება პროექტის მონიტორინგი და შეფასება.

„ვფიქრობ, აღნიშნული პროექტის ფარგლებში, ჩვენ შევძლებთ ინდუსტრიული სექტორის დახმარებას, ეკომეგობრული ტექნოლოგიების შემოტანას, რაც მნიშვნელოვანია ადამიანის ჯანმრთელობასა და გარემოზე ზრუნვისთვის“, - განაცხადა გაეროს ინდუსტრიული განვითარების ორგანიზაციის (UNIDO) პროექტის მენეჯერმა, ლამია ბენაბასმა.

პროექტის განხორციელების შედეგად, მოხდება გარემოს დაცვის საკითხებში ჩართული სახელმწიფო უწყებების, საწარმოო და გადამმუშავებელი სექტორის შესაძლებლობების გაძლიერება, რაც ხელს შეუწყობს ინდუსტრიული მდგრადი ორგანული დამაბინძურებლების ეტაპობრივ შემცირებას.

ზაზა ფირალიშვილი -  მხოლოდ ერთი ნაბიჯია იმ ზღვრულ მომენტამდე, რომლის შემდეგაც ან დაუფარავი ავტორიტარიზმია, ან - პოლიტიკური კრახი
ვახტანგ ძაბირაძე - 30 წელზე მეტია, ჩვენთან ერთად თუ ვინმეა საქართველოს სუვერენიტეტის დამცველი, ჩვენი დასავლელი პარტნიორები არიან
ქართული პრესის მიმოხილვა 18.04.2024
კერძო ბიზნესის დახმარება რაიონის სკოლებს - „ნიკორა ჯგუფი“ განათლების მხარდაჭერას აგრძელებს
Hotsale.ge-მ „პრო ბონო მარათონი 2024“-ში მიიღო მონაწილეობა
კახა ოქრიაშვილი - საქართველოს მოსახლეობის 95% ევროპის გავლენის აგენტები ვხდებით!
საქართველოს ხელოვანები მიმდინარე პროცესებს ეხმიანებიან
Samsung Knox-მა 2024 წლის ტელევიზორებში უსაფრთხოების მაღალი სტანდარტების უზრუნველყოფისთვის CC სერტიფიკატი მიიღო