პრემიერ - მინისტრის ირაკლი ღარიბაშვილის განცხადებით, ოპოზიციის გაერთიანებას აქვს ნული პერსპექტივა. კითხვაზე, ოპოზიციის გაერთიანებას რა პერსპექტივა აქვს? ღარიბაშვილმა უპასუხა, რომ „ნული“.

„ოპოზიცია არის დაქსაქსული, დეგრადირებული, გაუბედურებული“, - განაცხადა ღარიბაშვილმა.

ამასთან, ჟურნალისტებმა პრემიერს Edison Research-ის საზოგადოებრივი აზრის გამოკითხვის შედეგების შეფასებაც სთხოვეს, რაზეც მთავრობის მეთაურმა აღნიშნა, რომ „ეს სასაცილო შედეგებია“.

„ეს არის ჩვეულებრივი სიყალბე, გაყალბებული, სასაცილო შედეგები“, -აღნიშნა ღარიბაშვილმა.

ცნობისთვის, Edison Research-ის საზოგადოებრივი აზრის გამოკითხვის თანახმად, ტელეკომპანია „ფორმულას“ დაკვეთით ჩატარდა, კითხვაზე, დღეს რომ საპარლამენტო არჩევნები ტარდებოდეს, რომელ პარტიას მისცემდით ხმას, გამოკითხულთა უმრავლესობა „ქართულ ოცნებას“ მისცემდა ხმას, მას მოსდევს „ნაციონალური მოძრაობა“, პარტიული რეიტინგის თანახმად, მესამე ადგილზეა პარტია „საქართველოსთვის“. გამოკითხვის შედეგები ასე ნაწილდება:„ქართული ოცნება“ - 37%, „ერთიანი ნაციონალური მოძრაობა" - 25, „საქართველოსთვის“ - 6%, „ლეიბორისტული პარტია“ - 5%, „ლელო“ - 4%, „გირჩი - მეტი თავისუფლება (ზურაბ ჯაფარიძე)“ - 4%, „ხალხისთვის“ (ანა დოლიძე) - 3%, „სტრატეგია აღმაშენებელი“ - 3%, გირჩი“ (იაგო ხვიჩია) - 3%, „დროა“ - 2, „ალტ ინფო“ - 2%, „მოქალაქეები” - 2, „ხალხის ძალა“ - 2%, „ევროპული საქართველო“ - 1%, „პატრიოტთა ალიანსი“ - 1%. კვლევის ფარგლებში, პირისპირი გამოკითხვის მეთოდით, ქვეყნის მასშტაბით შემთხვევითი შერჩევით გამოიკითხა საქართველოში მცხოვრები 1500 საარჩევნო უფლების მქონე 18 წლისა და მეტი ასაკის ადამიანი (ოკუპირებული ტერიტორიების გარდა). ცდომილება არის +/- 3%. საველე სამუშაოები მიმდინარეობდა 25 მაისი-14 ივნისის პერიოდში.