პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებული ლაზარე გრიგორიადისი პატიმრობაში რჩება.

აღნიშნული გადაწყვეტილება აღკვეთის ღონისძიების პატიმრობის გადასინჯვის შემდეგ თბილისის საქალაქო სასამართლოს მოსამართლემ ზვიად შარაძემ მიიღო.

ბრალდების მხარე დაკავებულის კვლავ პატიმრობაში დატოვებას შუამდგომლობდა, ვინაიდან პროკურორების თქმით, გრიგორიადისის მხრიდან მიმალვის, ახალი დანაშაულისა და მოწმეებზე ზემოქმედების საფრთხე კვლავ არსებობს.

აღნიშნულს დაცვის მხარე არ დაეთანხმა. ადვოკატების თქმით, გრიგორიადისი გამოძიებას არ მიმალვია, მიუხედავად იმისა, რომ ამისთვის საკმარისი დრო ჰქონდა.

ამასთან, უფლებადამცველები აცხადებდნენ, რომ ბრალდებულის მხრიდან არც ახალი დანაშაულის ჩადენის და მოწმეებზე ზემოქმედების საფრთხე არ არსებობს. ადვოკატებმა გრიგოროადისის 10 000-ლარიანი გირაოს სანაცვლოდ გათავისუფლების შუამდგომლობა დააყენა.

სხდომაზე ლაზარე გირგოროადისმა განაცხადა, რომ ის ვაკეში დააკავეს, ქალაქში იყო და არავინ დაკავშირებია, საგამოძიებო მოქმედებაში მიეღო მონაწილეობა. მოსამართლე ზვიად შარაძემ დაცვის მხარის არგუმენტები არ გაიზიარა.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.