„გირჩი მეტი თავისუფლების“ ლიდერის, ზურაბ ჯაფარიძისა და ამავე პარტიის წევრის, ნიკა მოსიაშვილის მიმართ, ადმინისტრაციულ სამართალდარღვევის ფაქტზე სასამართლოს გადაწყვეტილებას, ადვოკატი სააპელაციო სასამართლოში გაასაჩივრებს.

როგორც ჟურნალისტებთან საუბარში ადვოკატი გიორგი ტაბატაძე აცხადებს, მისთვის, გაუგებარია, თუ რას ეფუძნება მოსამართლის გადაწყვეტილება.

„მოსამართლემ დადგენილება გამოაცხადა, რის მიხედვითაც, 2 500-ლარიანი ჯარიმა დაუწერა, როგორც ნიკა მოსიაშვილს, ასევე ზურაბ ჯაფარიძეს. ეს დადგენილება ჩვენს მიერ აუცილებლად გასაჩივრდება, რადგან გაუგებარია, რას ეფუძნება. ჩვენ ვიდეომტკიცებულებები წარვადგინეთ, რომელიც უტყუარად ადასტურებს, რომ მათ არანაირი სამართალდარღვევა არ ჩაუდენიათ. მტკიცებულებები ადასტურებს იმას, რომ პოლიციელები, რომლებმაც ჩვენება მისცეს, ცრუ მოწმეები, მათ სასამართლოში ტყუილი თქვეს, რეალურად, ეს პოლიციელები იქ არ ყოფილან“, - განაცხადა ტაბატაძემ.

ცნობისთვის, „გირჩი მეტი თავისუფლების“ ლიდერი ზურაბ ჯაფარიძე და ამავე პარტიის წევრი ნიკა მოსიაშვილი სასამართლომ ადმინისტრაციულ სამართალდამრღვევად ცნო და თითოეულ მათგანს ადმინისტრაციული სახდელის სახით 2 500 - 2 500 ლარი დააკისრა. „გირჩი მეტი თავისუფლების“ ლიდერი ზურაბ ჯაფარიძე 8 მარტს, პარლამენტთან დააკავეს. მას ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული ქმედების ჩადენას ედავებოდნენ, რაც წვრილმან ხულიგნობასა და პოლიციისთვის წინააღმდეგობის გაწევას გულისხმობს.