თბილისის საკრებულოს წევრი და საქართველოს ფეხბურთის ფედერაციის ვიცე-პრეზიდენტი აკაკი ალადაშვილი უეფას იურიდიული კომიტეტის წევრი გახდა
შვეიცარიის ქალაქ ნიონში უეფას აღმასრულებელი კომიტეტის სხდომა გაიმართა, რომლის გადაწყვეტილებითაც, თბილისის საკრებულოს წევრი და საქართველოს ფეხბურთის ფედერაციის ვიცე-პრეზიდენტი აკაკი ალადაშვილი მომდევნო ოთხი წლის განმავლობაში უეფას იურიდიული კომიტეტის წევრი იქნება. ინფორმაციას თბილისის მუნიციპალიტეტის საკრებულო ავრცელებს.
მათივე ცნობით, აკაკი ალადაშვილი სფფ-ის მენეჯმენტის კიდევ ერთი წარმომადგენელია, რომელიც უეფას კომიტეტებს შეუერთდა.
„აღსანიშნავია, რომ აღმასრულებელი კომიტეტის მუშაობაში სფფ-ის პრეზიდენტმა, ლევან კობიაშვილმა კომიტეტის წევრის რანგში პირველად მიიღო მონაწილეობა.
აღმასრულებელმა კომიტეტმა დღის წესრიგით გათვალისწინებულ საკითხებზე იმსჯელა და შესაბამისი გადაწყვეტილებები მიიღო.
უეფას აღმასრულებელი კომიტეტის შემდეგი სხდომა 26 სექტემბერს კვიპროსში, ლიმასოლში, გაიმართება,“ - აღნიშნულია გავრცელებულ ინფორმაციაში.
