განათლების სამინისტრო - 2023 წლის გამოცდებისთვის მზადების პროცესი დასრულების ეტაპზეა

მთელი საქართველოს მასშტაბით, როგორც თბილისში, ასევე რეგიონებში 2023 წლის გამოცდებისთვის მზადების პროცესი დასასრულს უახლოვდება. ამის შესახებ ინფორმაციას საქართველოს განათლებისა და მეცნიერების სამინისტრო ავრცელებს.

მათივე ცნობით, წინასაგამოცდო მოსამზადებელ სამუშაოებს საქართველოს განათლებისა და მეცნიერების მინისტრის მოადგილე, გელა გელაძე პარლამენტის განათლებისა და მეცნიერების კომიტეტის თავმჯდომარესთან, გივი მიქანაძესთან და შეფასებისა და გამოცდების ეროვნული ცენტრის დირექტორთან, სოფიო გორგოძესთან ერთად პირადად გაეცნო.

„როგორც გელა გელაძემ აღნიშნა, საქართველოს მასშტაბით გამოცდებისთვის მზადება დასასრულს უახლოვდება და ყველა საგამოცდო ცენტრის შესაბამისი ინვენტარით აღჭურვის პროცესი გეგმით განსაზღვრულ ვადებში მიმდინარეობს. მინისტრის მოადგილის განცხადებით, სამინისტრო, შეფასებისა და გამოცდების ეროვნულ ცენტრთან ერთად, აპლიკანტებს ყველა პირობას უქმნის, რომ გამოცდები მშვიდ, კომფორტულ და უსაფრთხო გარემოში ჩატარდეს.

საგამოცდო ცენტრებში მიმდინარეობს ვიდეოკამერებისა და ელექტრო ქსელის მონტაჟი და, აგრეთვე, კომპიუტერების განთავსება. სპეციალური პროგრამები უკვე ჩაწერილია ლეპტოპებში, ამობეჭდილია პასუხების ფურცლები და დამხმარე მასალები, გამზადებულია შავი სამუშაოსათვის განკუთვნილი ფურცლებიც. თითოეული ცენტრი უზრუნველყოფილი იქნება სასწრაფო და სახანძრო დახმარების სერვისებით, გამართული საგზაო ინფრასტრუქტურითა და საგამოცდო ცენტრამდე მისასვლელი დამატებითი საზოგადოებრივი ტრანსპორტით.

აღსანიშნავია, რომ გამოცდების მაღალ დონეზე ორგანიზების მიზნით, გელა გელაძის ხელმძღვანელობით ფუნქციონირებს სპეციალურად დაკომპლექტებული საორგანიზაციო ჯგუფი, რომელშიც სხვადასხვა უწყების თანამშრომლები არიან წარმოდგენილნი.

საორგანიზაციო ჯგუფი შეხვედრებს რეგულარულ რეჟიმში მართავს, რათა საგამოცდო პროცესი ქვეყნის მასშტაბით ხარვეზების გარეშე, მაქსიმალურად კომფორტულ საგანმანათლებლო გარემოში წარიმართოს.

წელს ქვეყნის მასშტაბით 24 საგამოცდო ცენტრი გაიხსნება: თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავსა და ხულოში. წელს პირველად საგამოცდო ცენტრი გაიხსნება ამბროლაურშიც.

ერთიანი ეროვნული გამოცდებისათვის, სტუდენტთა საგრანტო კონკურსისათვის, საერთო სამაგისტრო გამოცდისათვის, ასევე მასწავლებლის საგნის გამოცდისა და უფროსი სპეციალური მასწავლებლის გამოცდისათვის ჯამში 75 000-ზე მეტი მსურველია დარეგისტრირებული.

2023 წლის ერთიანი ეროვნული გამოცდები 3 ივლისს ქართული ენისა და ლიტერატურის გამოცდით დაიწყება, საგნისა და უფროსი სპეციალური მასწავლებლის გამოცდაზე დარეგისტრირებულნი კი საგამოცდო პროცესში 6 ივლისიდან ჩაერთვებიან. 12 ივლისს ჩატარდება სტუდენტთა საგრანტო კონკურსი, ხოლო მაგისტრანტობის კანდიდატები საერთო სამაგისტრო გამოცდას 27-28 ივლისს ჩააბარებენ“, - ნათქვამია ინფორმაციაში.

არეგ კოჩინიანი - „ზანგეზურის კორიდორის“ საკითხში მოსკოვის პოზიცია აღმოჩნდა საკვანძო, რის გამოც არა მარტო გართულდა სომხეთ-რუსეთის ურთიერთობები, არამედ სომხეთმა თავის საგარეო პოლიტიკაში სერიოზული კორექტივები შეიტანა
ქართული პრესის მიმოხილვა 11.04.2024
მირიან მირიანაშვილი - ივანიშვილი რუსეთის დაშოშმინებას ცდილობს, კანონის მიღება ხელს არ შეუშლის საქართველოს ევროპისკენ სვლას, რადგან დასავლეთის ინტერესშია საქართველოს ევროკავშირის წევრობა
„SOCAR Team“ ტურნირი „პეტრას განძის“ გამარჯვებული გახდა
იგრძენი გაზაფხული – იცხოვრეთ ალერგიის გარეშე
კავკასიის უნივერსიტეტში NATO 75 საზეიმო სხდომა გაიმართა და ირაკლი წერეთლის სახელობის ნატოს კვლევითი ცენტრი გაიხსნა
TNET-ისა და Visa-ს ერთობლივი გრანდიოზული გათამაშება იწყება
გონიო, ბათუმი: საინვესტიციო შესაძლებლობები და ურბანული განვითარება
წინანდლის მამულში საგაზაფხულო სეზონი კირილ ზდანევიჩის გამოფენით გაიხსნება