ბატონო მოსამართლე, გთხოვთ ერთ შანსს, რომ ჩემს შვილებთან იმაზე ადრე დამაბრუნოთ, ვიდრე სასჯელით არის გათვალისწინებული, - ამის შესახებ კასპში მოკლული 34 წლის ნოდარ ღუნაშვილის მეუღლემ, დანაშაულის დაფარვის ბრალდებით დაკავებულმა ქეთევან ჩხაიძემ პროცესზე განაცხადა.

ქეთევან ჩხაიძე სააპელაციო სასამართლოში სხდომას დისტანციურად ჩაერთო.

„საქმე ჩემი ჩვენების საფუძველზე გაიხსნა. არცერთ პროცესზე თავი არ მიმართლებია. გამოძიებამ, პროკურატურამ და პირველი ინსტანციის სასამართლომ დანაშაულის დაფარვის მიზნით დამაკავა და ამავე მუხლით გამასამართლა. მე გულწრფელად მაქვს თქვენი იმედი. ბატონო მოსამართლე, გთხოვთ ერთ შანსს, რომ ჩემს შვილებთან იმაზე ადრე დამაბრუნოთ, ვიდრე სასჯელით არის გათვალისწინებული" , - განაცხადა ქეთევან ჩხაიძემ.

შეგახსენებთ, 2021 წლის 13 მარტს, კასპში 34 წლის ნოდარ ღუნაშვილი მოკლეს. მკვლელობის ფაქტზე, შემთხვევიდან მეორე დღეს, სამართალდამცავებმა მოკლულის მეგობარი - ზურაბ კახიშვილი დააკავეს. გამოძიების ინფორმაციით, ბრალდებულმა ღუნაშვილს ანგარიშსწორების მიზნით, ცივი იარაღით სხეულზე სასიკვდილო ჭრილობები მიაყენა. მომხდარიდან გარკვეული პერიოდის შემდეგ, სამართალდამცავებმა განსაკუთრებით მძიმე დანაშაულის დაფარვის ბრალდებით დააკავეს მოკლული მამაკაცის მეუღლე - ქეთევან ჩხაიძე. დაკავებულებს ბრალი განზრახ მკვლელობისა და განსაკუთრებით მძიმე დანაშაულის დაფარვის ფაქტებზე, სსკ-ს 108-ე და 375-ე მუხლის მესამე ნაწილით ჰქონდათ წარდგენილი. 2021 წლის 3 დეკემბერს კი, გორის რაიონულმა სასამართლომ კახიშვილს უვადო, ჩხაიძეს კი 5,6 წლით თავისუფლების აღკვეთა მიუსაჯა.