საპარლამენტო ოპოზიცია უპრობლემოდ ითმენს ყოველგვარ ზღვარგადასულ დაცინვას "ოცნების" ყველა დონის წარმომადგენლისგან, ისე არიან ჩაბუდებული ამ სკამებში, იმის განხილვაც კი არ უნდათ, რომ ქართული პოლიტიკის მთელის სიმძაფრე დღეს ქუჩაშია გადმოტანილი და არა პარლამენტში, - ამის შესახებ პარტია „ტრიბუნას“ლიდერმა დავით ჭიჭინაძემ განაცხადა.

ჭიჭინაძე მოქმედ პარლამენტს სამარცხვინოს უწოდებს.

„მეათე მოწვევის პარლამენტი არის ყველაზე სამარცხვინო პარლამენტი ჩვენს ისტორიაში და შევარდნაძის მმართველობის ბოლო პერიოდის პარლამენტს ჰგავს.

ამიტომ, რაც არ უნდა ციფრებით იმანიპულიროს დღეს „ქართულმა ოცნებამ“ და ღარიბაშვილმა, ცხოვრების დონის ყველაზე დიდი ვარდნა, სწორედ ამ პარლამენტის დროს მოხდა. სტატუსი რომც მოგვანიჭონ, მაინც არაფერი შეიცვლება. ფულის პარვას, ხალხის ძარცვას, ოპოზიციისგან „ბუას“ ხატვას ისევ გააგრძელებენ და იმიტომ. ან რა სტატუსი უშველის კობახიძეებს?! საპარლამენტო ოპოზიციას რაც შეეხება, ისე უპრობლემოდ ითმენენ ყოველგვარ ზღვარგადასულ დაცინვას „ოცნების“ ყველა დონის წარმომადგენლისგან, ისე არიან ჩაბუდებული ამ სკამებში, იმის განხილვაც კი არ უნდათ, რომ ქართული პოლიტიკის მთელის სიმძაფრე დღეს ქუჩაშია გადმოტანილი და არა პარლამენტში. არადა, პარლამენტში ოპოზიცია „ოცნებას“ საკადრის პასუხს ვერასოდეს გასცემს და ვართ ასე შაპიტოში“, - აცხადებს დავით ჭიჭინაძე, რომლის კომენტარსაც „ტრიბუნა“ ავრცელებს.