GDI ეხმაურება „პრაიდ კვირეულს“ და პასუხისმგებელ უწყებებს მოუწოდებს, გაატარონ ყველა ზომა „პრაიდ კვირეულის“ უსაფრთხო გარემოში ჩატარებისთვის და ლგბტ+ თემისა და მათი მხარდამჭერების უფლებების დაცვისთვის.

„საქართველოს დემოკრატიულ ინიციატივაში“ აღნიშნავენ, რომ GDI გმობს ხელისუფლებისა და სხვადასხვა ჯგუფების მხრიდან წახალისებულ ჰომოფობიურ ტალღას.

„აღსანიშნავია, რომ საჯარო სივრცეში ვრცელდება ძალადობისკენ მოწოდების და მუქარის შემცველი არაერთი განცხადება, რაც შსს-ს მხრიდან სათანადო და ეფექტიან რეაგირებას საჭიროებს. იმ პირობებში, როდესაც გასულ წლებში იმავე ჯგუფებისგან ძალადობის არაერთი ფაქტი დაფიქსირდა, საციცოცხლოდ მნიშვნელოვანია სამართალდამცავი უწყებების მიერ გატარდეს დროული და მკაცრი ღონისძიებები მოძალადე ჯგუფების წინააღმდეგ.

GDI გმობს ხელისუფლებისა და სხვადასხვა ჯგუფების მხრიდან წახალისებულ ჰომოფობიურ ტალღას და სრულ მხარდაჭერას უცხადებს კვირეულის ორგანიზატორებს, ისევე როგორც ყველა იმ ადამიანს, ვისაც სურს საკუთარი უფლებების რეალიზება და თანასწორუფლებიანი გარემოს შექმნა საქართველოში.

შეკრებისა და გამოხატვის თავისუფლება ეკუთვნის ყველას თანასწორად, ხოლო ძალადობას გამართლება არ აქვს!“,- აღნიშნულია ინფორმაციაში.