საპატრიარქო „თვითმარქვია სასულიერო პირის შესახებ“ განცხადებას ავრცელებს და აღნიშნავს, რომ პირი, რომელიც საზოგადოებას მღვდელ ნიკოლოზ მამცელიძის სახელით ეცნობა, მართლმადიდებელ ეკლესიაში ხელდასხმული არ არის
საქართველოს საპატრიარქოს საზოგადოებასთან ურთიერთობის სამსახური „თვითმარქვია სასულიერო პირის შესახებ“ განცხადებას ავრცელებს.
მათი ინფორმაციით, მამაკაცი, რომელიც საზოგადოებას ე.წ. მღვდელი ნიკოლოზ მამცელიძის სახელით ეცნობა, საქართველოს მართლმადიდებელ ეკლესიაში ხელდასხმული არ არის.
საპატრიარქო საზოგადოებას აფრთხილებს, არ შევიდეს შეცდომაში.
„სოციალური ქსელის მეშვეობით ჩვენთვის ცნობილი გახდა პიროვნების შესახებ, რომელიც, როგორ ფოტოდან ჩანს, სასულიერო პირის შესამოსლითა და ჯვრით არის წარმოდგენილი. ირკვევა, რომ იგი საზოგადოებას მღვდელ ნიკოლოზ მამცელიძის სახელით ეცნობა. ჩვენ მიერ მოძიებული ინფორმაციის თანახმად დადგინდა, რომ აღნიშნული პიროვნება არ არის საქართველოს მართლმადიდებელ ეკლესიაში ხელდასხმული. ამიტომ გვინდა საზოგადოება გავაფრთხილოთ, არ შევიდეს შეცდომაში და იცოდეს, რომ ამ პიროვნების ნებისმიერი ქმედება თვითნებური და დამაბრკოლებელია“, - აღნიშნულია განცხადებაში.
