გერმანიის ფედერაციული რესპუბლიკის წარმომადგენელმა ევროჯასტში, პროკურორმა იან მაკლინმა „ქოლ-ცენტრების“ საქმიანობაში დავით კეზერაშვილის კავშირის შესახებ კითხვას უპასუხა და განაცხადა, რომ აღნიშნულ საქმეზე გამოძიება მიმდინარეობს.
როგორც გადაცემის წამყვანმა კითხვის დასმის დროს აღნიშნა, ძალიან დიდი ინტერესი გამოიწვია საქართველოში BBC-ის დოკუმენტურმა ფილმმა, სადაც ნახსენები იყო საქართველოს თავდაცვის ყოფილი მინისტრი დავით კეზერაშვილი. კითხვაზე - იკვეთება თუ არა დავით კეზერაშვილის როლი „ქოლ ცენტრების“ საქმიანობაში, იან მაკლინმა განაცხადა, რომ აღნიშნულთან დაკავშირებით კითხვას ვერ უპასუხებს, რადგან ეს გავლენას მოახდენს გამოძიებაზე.
„მოგახსენებთ, რომ ვნახე BBC-ის დოკუმენტური ფილმი, მაგრამ გამოძიების ინტერესებიდან გამომდინარე, ამ ეტაპზე კომენტარს ვერ გავაკეთებ. ჩვენ რომ გვესაუბრა უკვე დასრულებულ გამოძიებაზე, შეგვეძლო დეტალებიც გვეხსენებინა, თუმცა ამ ეტაპზე ეს დააზიანებს აღნიშნულ საქმეზე მიმდინარე გამოძიების ინტერესებს“, - აღნიშნა იან მაკლინმა.
