ჩემი შიდაწრიდან გავიგე, რომ მეუფე შიო, სავარაუდოდ, დარიშხანით არის მოწამლული, რაც ნაპოვნია მის ანალიზში, - ამის შესახებ ჟურნალისტებს სატელეფონო კომენტარში, სამების ტაძრის იღუმენმა გაბრიელმა განუცხადა.

სასულიერო პირის ინფორმაციით, მეუფე შიო ახლა თავს კარგად გრძნობს.

„3 კვირის წინ, მეუფემ წირვა ჩაატარა და მის შემდგომ რომ შეუძლოდ იყო, ინფორმაცია გვქონდა. ალბათ, ბოლო 2-3 კვირაა, რაც დადასტურდა, რომ მის სისხლში დარიშხანი იპოვეს. ამის შესახებ ალბათ, საპატრიარქოს პრესცენტრი იტყვის, მე არ მაქვს ინფორმაცია. უშუალოდ საპატრიარქოსთან საუბარი არ მქონია, მე უბრალოდ, ჩემი შიდაწრიდან გავიგე, რომ სავარაუდოდ, დარიშხანით არის მოწამლული, რაც ნაპოვნია მის ანალიზში. როგორც ვიცი, ანალიზი გაკეთდა ალბათ 3 კვირის ან 1 თვის წინ. ჩემი ინფორმაციით, ახლა მეუფე თავს კარგად გრძნობს, ღმერთმა კარგად ამყოფოს“, - განაცხადა იღუმენმა გაბრიელმა.

ინფორმაციისთვის, საქართველოს საპატრიარქოს ტახტის მოსაყდრე, შიო მუჯირი, სავარაუდოდ, მოწამლეს. აღნიშნულის შესახებ ინფორმაცია მედიაში ვრცელდება. უფრო კონკრეტულად, „რუსთავი 2“-ინფორმაციით, მეუფე შიოსთვის ჩატარებული კვლევების შედეგად, ანალიზებში არაერთი საეჭვო ნივთიერება აღმოჩნდა. ასევე ტელეკომპანიის ცნობით, საპატრიარქოში ეჭვობენ, რომ პატრიარქის თანამოსაყდრეს დროთა განმავლობაში, ეტაპობრივად წამლავდნენ.

უმაღლესი იერარქიის სასულიერო პირის სავარაუდო მოწამვლის შესახებ ინფორმაცია გაავრცელა „მთავარმა არხმაც“. ტელეკომპანიის ინფორმაციით, მეუფე შიო ერთი კვირის წინ მოწამლეს. სავარაუდო ინფორმაციით, პატრიარქის თანამოსაყდრემ ერთ-ერთი ღვთისმსახურებისას თავი შეუძლოდ იგრძნო და შემდეგ ჩატარებულმა სამედიცინო კვლევებმა მის სისხლში დარიშხანის კვალი აჩვენა.