საქართველოს ინოვაციებისა და ტექნოლოგიების სააგენტოსა და ევროკავშირს შორის მემორანდუმი გაფორმდა, რომლის ფარგლებშიც, მხარეებმა წარადგინეს IT ეკოსისტემის განვითარების გეგმა - Do IT with the EU. ამის შესახებ ინფორმაციას საქართველოს ინოვაციებისა და ტექნოლოგიების სააგენტო ავრცელებს. უწყების თანახმად, პროექტის მიხედვით, 2 წლის განმავლობაში, ევროკავშირის მხარდაჭერით საქართველოს 1300-ზე მეტი მოქალაქე მსოფლიო ბაზარზე ყველაზე მოთხოვნად და მაღალანაზღაურებად პროფესიებში გადამზადდება, როგორებიცაა: პროგრამირება, პროექტ მენეჯმენტი, დიზაინი, და სხვა.

„პროგრამა მიზნად ისახავს საქართველოში IT სექტორის ტრანსფორმაციას მსოფლიო დონის სტანდარტების ინტეგრირებით, უნარების განვითარების ხელშეწყობითა და საქართველოს მოქალაქეებისთვის დასაქმების განსაკუთრებული შესაძლებლობების შექმნის გზით. აგრეთვე, დიდი აქცენტი გაკეთდება ქალთა გაძლიერებაზე ტექ ინდუსტრიაში.

“IT ეკოსისტემის განვითარების პროექტი საქართველოს IT სექტორის მომავლისკენ ტრანსფორმაციულ ნახტომს წარმოადგენს. პროგრამა წაახალისებს სამუშაო ადგილების შექმნას ინოვატორებისა და მეწარმეებისთვის საერთაშორისო IT კომპანიებთან ერთად მუშაობის შესაძლებლობის მიცემის გზით, რაც, საბოლოოდ, რეგიონში საქართველოს კონკურენტუნარიანობას გააძლიერებს,” - განაცხადა ევროკავშირის თანამშრომლობის ხელმძღვანელმა, ნიკოლას სენდროვიჩმა.

პროექტი ორი ნაწილისაგან შედგება. ერთი ჯიტას წარმატებული პროექტის - 3000 IT სპეციალისტის გადამზადების პროგრამის გაგრძელებაა, მეორე კი, სპეციალურად ამ პროექტის ფარგლებში შემუშავდა.

“ეს ახალი პარტნიორობა ცნობილი კომპანიების შემოსვლას ქართულ ბაზარზე არა მხოლოდ სტიმულს აძლევს, არამედ ადგილობრივი IT სპეციალისტებისთვის ეს მაღალანაზღაურებადი სამუშაო ადგილებისა და საერთაშორისო პროექტებში წვლილის შეტანის შესაძლებლობაა,” - განაცხადა საქართველოს ინოვაციებისა და ტექნოლოგიების სააგენტოს თავმჯდომარემ, ავთანდილ კასრაძემ.

“Do IT with the EU” პროგრამა სექტემბერში დაიწყება, რომლის ფარგლებშიც 1300-ზე მეტ ადამიანს საშუალება მიეცემა, მოიპოვოს საერთაშორისო სერტიფიკატი და გახდეს კონკურენტუნარიანი საერთაშორისო ტექ ბაზარზე”,- აღნიშნულია ინფორმაცია.