აღმოაჩინე საქართველო m&i-სთან ერთად - გლობალური ფორუმის მონაწილეებისთვის ტურიზმის ეროვნულმა ადმინისტრაციამ მიღება გამართა
გერმანიის, საფრანგეთის, დიდი ბრიტანეთისა და სხვა ქვეყნების 60-მდე საერთაშორისო გაყიდვების კომპანიის წარმომადგენელი ქართულ კულტურასა და კულინარიას გაეცნო. ინფორმაციას ტურიზმის ეროვნული ადმინისტრაცია ავრცელებს.
სპეციალური მიღება m&i-ის ფორუმის მონაწილეებისათვის საქართველოს ტურიზმის ეროვნულმა ადმინისტრაციამ მოაწყო.
მათივე ცნობით, საქმიანი ტურიზმის სფეროში ერთ-ერთი ყველაზე მასშტაბური ფორუმი თბილისში ტურიზმის ეროვნული ადმინისტრაციის საკონვენციო და საგამოფენო ბიუროს ორგანიზებით ტარდება. ფორუმის ფარგლებში ქართული კომპანიების წარმომადგენლებთან საქმიანი შეხვედრები გაიმართება.
„m&i-ის ფორუმის დამკვეთები სამიზნე ბაზრებზე მოღვაწე მაღალი გაყიდვების მქონე კომპანიებს წარმოადგენენ, რომლებიც ღონისძიებების დამკვეთ კლიენტებთან, შემდგომში ღონისძიების ორგანიზებისთვის სხვადასხვა ქვეყნისა თუ დანიშნულების ადგილის შეთავაზების მიზნით აქტიურად მუშაობენ.
ფორუმის მიზანია საქართველოში მსხვილი საერთაშორისო კონფერენციების, ფორუმების, კონგრესების ჩატარება“, - აღნიშნულია ინფორმაციაში.
