ექსპერტ ალექსანდრე დადიანიძის განცხადებით, ჩატარებული ექსპერტიზის თანახმად, ბრალდებულ ლაზარე გრიგორიადისის ქურთუკზე ნავთობპროდუქტი აღმოჩნდა. აღნიშნულის შესახებ შსს-ს თანამშრომელმა, ქიმიური ექსპერტიზის განყოფილების მთავარმა ექსპერტმა ალექსანდრე დადიანიძემ თბილისის საქალაქო სასამართლოში განაცხადა, სადაც მოწმის სახით წარსდგა.

მისი თქმით, საქმეზე კომპლექსური ექსპერტიზა ჩატარდა.

„ექსპერტიზაზე წარდგენილი იყო ლაზარე გრიგორიადისის კეპი, ჰუდი, ფეხსაცმელი და ქურთუკი, ხოლო ჩატარებული კვლევის მიხედვით, მხოლოდ ქურთუკზე იყო ნავთობპროდუქტი აღმოჩენილი. ქურთუკი თავიდან ბოლომდე არის გამოკვლეული“, - განაცხადა ალექსანდრე დადიანიძემ.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.