ირაკლი ხმალაძე - აგვისტო-თებერვლის პერიოდში დადგინდება ის 12 მეტროსადგური, რომელსაც მოდერნიზაცია და განახლება ჩაუტარდება

თბილისის ვიცე-მერის, ირაკლი ხმალაძის განცხადებით, აგვისტოდან თებერვლის ჩათვლით პერიოდში სატენდერო პირობები განისაზღვრება და დადგინდება ის 12 მეტროსადგური, რომელსაც მოდერნიზაცია და განახლება ჩაუტარდება.

როგორც მან ჟურნალისტებს განუცხადა, სპეციალური დახრილი ლიფტები იმ მეტროსადგურზე უნდა დამონტაჟდეს, სადაც ეს შესაძლებელი იქნება.

„ჯერჯერობით, ხელშეკრულება ფორმდება კონსულტანტთან, რომელმაც უნდა დაწეროს სატენდერო პირობები და განსაზღვროს თანმიმდევრობები, როგორც სამუშაოს შესრულების, ასევე მეტროსადგურების რიგითობა, თუ სად არის ეს სამუშაოები შესასრულებელი. ეს გაგრძელდება დაახლოებით აგვისტოდან თებერვლის ჩათვლით პერიოდში, სადაც დოკუმენტაციის სრულყოფა მოხდება და შემდგომში მოხდება უკვე საპროექტო და სარეაბილიტაციო სამუშაოებზე ტენდერის გამოცხადება. რაც შეეხება კითხვას, თუ სად უნდა დამონტაჟდეს დახრილი ლიფტები, სადაც შესაძლებელია, ხელმისაწვდომობის მიზნით ყველა მეტროსადგურში უნდა მოხდეს ეს ყველაფერი“, - განაცხადა ხმალაძემ.

გარდა ამისა, თბილისის ვიცე-მერმა მეტროსადგურ „ავლაბრის“ სარეაბილიტაციო სამუშაოებზეც ისაუბრა და აღნიშნა, რომ პროექტის დაკორექტირება გახდა საჭირო, რომელიც ახლა სამხარაულის ექსპერტიზის ეროვნულ ბიუროშია გადაგზავნილი.

„სამუშაოების წარმოების დროს გამოვლინდა, რომ ერთ-ერთ კონსოლს აქვს პრობლემა, რომელიც პროექტით არ იყო გათვალისწინებული. პროექტის დაკორექტირება გახდა საჭირო, რომელიც ახლა გადაგზავნილია სამხარაულის ექსპერტიზის ეროვნულ ბიუროში. მას შემდეგ, რაც კორექტირებული პროექტი დადასტურდება, დაკორექტირდება სარეაბილიტაციო ნებართვა და სარეაბილიტაციო სამუშაოები გაგრძელდება“, - განაცხადა ხმალაძემ.

ცნობისთვის, თბილისის მერის, კახა კალაძის განცხადებით, 2023-2029 წლებში 12 მეტროსადგურის რეაბილიტაციაა დაგეგმილი. როგორც მან დედაქალაქის მთავრობის სხდომაზე განაცხადა, პროექტისთვის, ევროპის რეკონსტრუქციისა და განვითარების ბანკის მიერ 50 მლნ ევრო სესხის, ხოლო 5 მლნ ევრო გრანტის სახითაა გამოყოფილი.

ვახტანგ ძაბირაძე - 30 წელზე მეტია, ჩვენთან ერთად თუ ვინმეა საქართველოს სუვერენიტეტის დამცველი, ჩვენი დასავლელი პარტნიორები არიან
ემილ ავდალიანი - ამიერიდან ირანი და ისრაელი მეტოქეობის განსხვავებულ ეტაპზე გადავიდნენ
ქართული პრესის მიმოხილვა 18.04.2024
კახა ოქრიაშვილი - საქართველოს მოსახლეობის 95% ევროპის გავლენის აგენტები ვხდებით!
საქართველოს ხელოვანები მიმდინარე პროცესებს ეხმიანებიან
Samsung Knox-მა 2024 წლის ტელევიზორებში უსაფრთხოების მაღალი სტანდარტების უზრუნველყოფისთვის CC სერტიფიკატი მიიღო