ვფიქრობ, რომ საქართველოსა და ჩინეთს შორის თანამშრომლობა სრულიად ახალ, ძალიან მაღალ საფეხურზე გადავიდა და ეს ჩვენი ქვეყნისთვის მნიშვნელოვანია, - ამის შესახებ სოფლის მეურნეობის მინისტრმა ოთარ შამუგიამ განაცხადა.

მისი თქმით, ორ ქვეყანას შორის ურთიერთობების ახალ ეტაპზე გადასვლა ჩინეთის ბაზარზე ექსპორტის ზრდას ხელს შეუწყობს.

„დღეს გამოქვეყნდა ერთობლივი განცხადება სტრატეგიული პარტნიორობის გამყარების შესახებ. ხაზი მინდა გავუსვა პრემიერ-მინისტრის წარმატებულ ვიზიტს ჩინეთში. თქვენ იცით, რომ პრეზიდენტთან, პრემიერ-მინისტრთან მნიშვნელოვანი შეხვედრები შედგა, გაფორმდა მემორანდუმები სხვადასხვა მიმართულებით. დღეს, ორ ქვეყანას შორის სტრატეგიული პარტნიორობის გამყარების შესახებ, ერთობლივი განცხადება გამოქვეყნდა. ეს დოკუმენტი გულისხმობს თანამშრომლობის გაღრმავებას როგორც პოლიტიკური, ასევე ეკონომიკური და სხვადასხვა მიმართულებით. ვფიქრობ, რომ ორ ქვეყანას შორის თანამშრომლობა გადავიდა სრულიად ახალ, ძალიან მაღალ საფეხურზე და ეს ძალიან მნიშვნელოვანია ჩვენი ქვეყნისთვის. პრემიერის ვიზიტის ფარგლებში გამართულ ბიზნეს ფორუმზე წარმოდგენილია როგორც საქართველოს, ასევე ჩინეთის ბიზნეს სექტორი. აქ არიან ღვინის მწარმოებელი კომპანიები, რომლებიც წლებია ღვინის ექსპორტს ახორციელებენ. ჩვენ აქტიურად ვმუშაობთ, რათა ქართული ღვინო ჩინეთის ბაზარზე პოპულარული იყოს. შედეგად, ყოველწლიურად დაახლოებით 4 მილიონი ლიტრი ღვინის ექსპორტი ხორციელდება ჩინეთში, თუმცა ეს პროცესები, რომელსაც ვაკვირდებით, მნიშვნელოვან სტიმულს მისცემს როგორც ღვინის, ისე სხვა პროდუქციის ექსპორტის ზრდას ჩინეთის ბაზარზე და ჩვენს პარტნიორებთან, ბიზნესსექტორთან ერთად გავაგრძელებთ აქტიურ მუშაობას იმისთვის, რომ ექსპორტი ყოველწლიურად, მნიშვნელოვნად გაიზარდოს", - განაცხადა ოთარ შამუგიამ.