„რუსეთი მტერია და არა სტუმარი” - ამ ლოზუნგით საქართველოს პარლამენტის შენობასთან სამოქალაქო აქტივისტები აქციას მართავენ.

აქციის მონაწილეების განცხადებით, დღევანდელი პროტესტი არის სოლიდარობის აქტი მშვიდობიანი დემონსტრანტების მიმართ, რომლებიც ბათუმში დააკავეს.

შეკრებილებს აქციაზე აქვთ ბანერები წარწერით: “სავიზო რეჟიმი ღორებს”, “რუსეთი მტერია და არა სტუმარი”, “ჩვენ ვართ ევროპა”.

აქციის ერთ-ერთი ორგანიზატორის, “ჯიუტების” ერთ-ერთი წევრის, ლაშა ჯანჯღავას განცხადებით, რუსეთიდან ჩამოსული ტურისტი არ არის სტუმარი, არამედ მტერია.

“დღეს შევიკრიბეთ იქიდან გამომდინარე, რომ სოლიდარობა გამოვუცხადოთ იმ ბათუმელ ახალგაზრდებს, აქტივისტებს, ვინც რუსული გემის შემოსვლა გააპროტესტა, მხოლოდ ბათუმში არ ხდება საქართველოს რუსიფიკაცია. დღეს ჩვენი შეკრების მიზანია, ადამიანებს გავაგონოთ ხმა, რომ მთელ საქართველოშია პრობლემა. თითქოს სტუმრები არიან, რეალურად რუსეთი საქართველოს მტერია და არა სტუმარი”, - განაცხადა ლაშა ჯანჯღავამ.