ბათუმის საქალაქო სასამართლოში ბათუმის პორტთან ორი დღის წინ დააკავებული 8 პირის სასამართლო პროცესი გაიმართა
ბათუმის საქალაქო სასამართლოში დღეს 8 პირის პროცესი გაიმართა, რომლებიც ბათუმის პორტთან ორი დღის წინ დააკავეს. დაკავებულების ადვოკატები აცხადებდნენ, რომ მათ დამატებითი დრო სჭირდებათ მტკიცებულებების შესაგროვებლად. თავის მხრივ, ბრალდებულები სასამართლო დარბაზიდან ხელწერილის საფუძველზე გათავისუფლდნენ. როგორც მათ ჟურნალისტებს განუცხადეს, აქციის დროს სამართალდამცავებმა დაკავებისას ფიზიკური დაზიანებები მიაყენეს. ასევე განმარტეს, რომ მშვიდობიან აქციაზე იმყოფებოდნენ და უკანონოდ მოხდა მათი დაკავება.
საქმე ბათუმის საქალაქო სასამართლოს მოსამართლე ალექსანდრე გოგუაძემ განიხილა, მოსამართლე გადაწყვეტილებას უახლოეს სხდომაზე მიიღებს.
ცნობისთვის, სოჭიდან წამოსული საკრუიზო ლაინერის ბათუმის პორტში შემოსვლას მოქალაქეების მხრიდან პროტესტი მოჰყვა. სამართალდამცავებსა და აქციის მონაწილეთა შორის რამდენჯერმე ფიზიკური და სიტყვიერი დაპირისპირება მოხდა, რის შედეგად შინაგან საქმეთა სამინისტროს თანამშრომლებმა 23 პირი დააკავეს, ნაწილი გუშინ გათავისუფლდნენ.
