ონის მუნიციპალიტეტში, სტიქიის ზონაში, მეორე დღეა საქართველოს წითელი ჯვრის ონისა და ამბროლაურის ფილიალების თანამშრომლები და მოხალისეები კვლავ მობილიზებული არიან შემთხვევის ადგილზე.

წითელი ჯვრის ცნობით, მზადყოფნაშია: ონისა და ამბროლაურის პირველი დახმარების გუნდები, რომლებიც სასწრაფოსთან ერთად მოქმედებენ დაშავებულების დასახმარებლად.

„ფსიქოსოციალური დახმარების გუნდი, რომელიც ფსიქოლოგიურ დახმარებას უწევს დაზარალებულებს, თვითმხილველებსა და ადგილზე მყოფთ.

ოჯახური კავშირების აღდგენის გუნდი, რომელიც მუშაობს, როგორც დაკარგული, ისე მოძიებული პირების შესახებ ინფორმაციის შეგროვებაზე. ადგენს შესაბამის სიებს და აქტიურად თანამშრომლობს შესაბამის სტრუქტურებთან არსებული ინფორმაციის მოსაპოვებლად.

კატასტროფების მართვის გუნდი, რომელიც წითელ ჯვარში გადამწყვეტ როლს ასრულებს საგანგებო სიტუაციებსა და კატასტროფებზე ეფექტური რეაგირების საქმეში. მათი ამოცანები მოიცავს აქტივობების ფართო სპექტრს, რომელიც მიმართულია როგორც მზადყოფნაზე, ისე რეაგირებაზე.

საქართველოს წითელი ჯვარი მიმართავს ყველას, გთხოვთ, მოგვაწოდოთ ნებისმიერი სახის ინფორმაცია შოვში დაკარგულთა შესახებ და დაგვიკავშირდეთ ცხელ ხაზზე : 032 2 501 105“, - ნათქვამია ინფორმაციაში.