ჩვენი დიპლომატიური ძალისხმევა დღეს თითქმის ექსკლუზიურად იხარჯება „ქართული ოცნების” რუსული ავტორიტარიზმისკენ მიმავალი გზის გასამართლებლად. „ოცნება“ ხარჯავს მილიონებს ლობირებაში. ჩვენი დიპლომატების მუშაობა მხოლოდ ოპოზიციაზე თავდასხმისა და მთავრობის ცუდი ქმედებების გამართლებაზეა ორიენტირებული, - ამის შესახებ „ერთიანი ნაციონალური მოძრაობის” საგარეო ურთიერთობების დეპარტამენტის უფროსის მოადგილე ალექსანდრე კრევო ასათიანი სოციალურ ქსელში წერს.

მისი თქმით, საქართველოს მესამე პრეზიდენტმა, მიხეილ სააკაშვილმა და წინა ხელისუფლებამ თავის დროზე წამოიწყეს არაღიარების პოლიტიკა, რომელიც დღემდე რჩება ერთ-ერთ ყველაზე წარმატებულ დიპლომატიურ კამპანიად საქართველოს ისტორიაში.

„15 წელი გავიდა მას შემდეგ, რაც რუსეთის ფედერაციამ უხეშად დაარღვია საერთაშორისო სამართალი და აღიარა აფხაზეთი და ე.წ. სამხრეთ ოსეთი. ამის საპასუხოდ პრეზიდენტმა მიხეილ სააკაშვილმა და წინა ხელისუფლებამ თავის დროზე წამოიწყეს არაღიარების პოლიტიკა, რომელიც დღემდე რჩება ერთ-ერთ ყველაზე წარმატებულ დიპლომატიურ კამპანიად საქართველოს ისტორიაში. ამ პოლიტიკით საქართველომ მოახერხა რუსეთის ლობირებისა და ზეწოლის დამარცხება მთელ მსოფლიოში, განსაკუთრებით ეფექტური იყო ლათინურ ამერიკაში, აფრიკასა და წყნარ ოკეანეში.

სამწუხაროდ, “ქართული ოცნების” ხელისუფლების პირობებში ეს პოლიტიკა მთლიანად გაქრა და აქ, მინდა მოგიყვანოთ ამის მაგალითი ბოლო რამდენიმე წლის განმავლობაში:

- 2019 წელს პროდასავლური ხუან გუაიდო გახდა ვენესუელას პრეზიდენტი და დასავლურმა სამყარომ შეწყვიტა ნიკოლას მადუროს კომუნისტური რეჟიმის ლეგიტიმურობის აღიარება. იმ დროს გუაიდო მზად იყო გაეუქმებინა აფხაზეთისა და ცხინვალის აღიარება. ვიცი, რადგან მაიამიში ყოფნისას პირდაპირ ვესაუბრებოდი გუაიდოს ადმინისტრაციას. თუმცა, საქართველოს მთავრობამ არ გადადგა არცერთი ნაბიჯი ამ აღიარების გასაუქმებლად. ამ დიპლომატიურ მარცხს ახსნა არ აქვს.

- 2018 წელს ასადის რეჟიმის მიერ აფხაზეთის აღიარება დაგმო სირიის ეროვნულმა საბჭომ, რომელიც რამდენიმე ჩვენმა დასავლელმა პარტნიორმა ასადის ლეგიტიმურ ოპოზიციად, ხოლო სხვებმა სირიის ლეგიტიმურ მთავრობადაც კი მიიჩნიეს. თუმცა, ამის საპასუხოდ სულ რაც გავაკეთეთ, იყო ერთი შეხვედრის გამართვა და არც კი შევუერთდით სხვა პარტნიორებს სირიის ეროვნული საბჭოს ლეგიტიმურობის აღიარებაში.

- საინტერესოა ნაურუს შემთხვევაც. ნაურუ 2010 წელს რუსეთის მარიონეტული სახელმწიფო იყო, მაგრამ მას შემდეგ ხელისუფლება ოთხჯერ შეიცვალა. დღეს ნაურუ ოფიციალურად უჭერს მხარს უკრაინას რუსეთის წინააღმდეგ. გასულ ოქტომბერში მან ხმა მისცა გაეროს რეზოლუციას, რომელიც გმობს რუსეთის აგრესიას და აღიარებს უკრაინის ტერიტორიულ მთლიანობას. ეს საქართველოსთვისაც შესაძლებელია, თუმცა, როგორც არაერთხელ გამოჩნდა, საქართველოს მთავრობის ინტერესი ეს არ არის.

არაღიარების პოლიტიკა მხოლოდ ქვეყნებს არ ეხება. ის ეხება ასევე საერთაშორისო ორგანიზაციებს. მაგალითად, ბრიუსელში დაფუძნებული ჟურნალისტთა საერთაშორისო ფედერაცია, რომელიც არის მედია ორგანიზაციების უძველესი გაერთიანება მსოფლიოში. 2020 წელს რუსეთმა თაღლითურად გააყალბა ამ ორგანიზაციის ერთ-ერთი სხდომის ოქმი და აფხაზეთი სრულუფლებიან წევრად შეიყვანა.

ევროპელი ჟურნალისტთა ფედერაციის ცნობით, შესაძლებელი იყო რეზოლუციის მიღება და ამ ოქმის გამოსწორება, თუმცა ქართულმა მხარემ ეს ინტერესი არ გამოავლინა. დღეს თუ შეამოწმებთ ორგანიზაციის წევრთა სიას ნახავთ, რომ იქ საქართველოს წარმომადგენელი უკვე აღარ ჰყავს, ხოლო აფხაზეთის საოკუპაციო რეჟიმს ჰყავს.

ასევე, შეგახსენებთ, რომ იმ საქმეთა შორის, რომელზეც პრეზიდენტი მიხეილ სააკაშვილი დღეს უსამართლოდ ზის ციხეში, ერთ-ერთი ეპიზოდი ეხება სწორედ არაღიარების პოლიტიკას. მაგალითისთვის, 2013 წელს, პრეზიდენტმა სააკაშვილმა ტაილანდში მოაწყო ღონისძიება წყნარი ოკეანის კუნძულების რამდენიმე ლიდერთან, რათა ესაუბრა საქართველოს ტერიტორიულ მთლიანობაზე. ამ შეხვედრის პირდაპირი შედეგი იყო ვანუატუს მიერ აფხაზეთის აღიარების უკან გამოხმობა. დღეს ეს ღონისძიება ე.წ „პიჯაკების საქმის“ ნაწილია.

ჩვენი დიპლომატიური ძალისხმევა დღეს თითქმის ექსკლუზიურად იხარჯება „ქართული ოცნების” რუსული ავტორიტარიზმისკენ მიმავალი გზის გასამართლებლად. “ოცნება“ ხარჯავს მილიონებს ლობირებაში. ჩვენი დიპლომატების მუშაობა მხოლოდ ოპოზიციაზე თავდასხმისა და მთავრობის ცუდი ქმედებების გამართლებაზეა ორიენტირებული. ამიტომაც ყურადღება აღარ ვაქცევთ არაღიარების პოლიტიკას”, - წერს ალექსანდრე კრევო ასათიანი სოციალურ ქსელში.

ალექსანდრე კრევო ასათიანის მოსაზრებას „ნაციონალური მოძრაობა“ ავრცელებს.