ბოლო პერიოდში, რუსეთი ძალიან გააქტიურდა საქართველოს ოკუპირებულ ტერიტორიებთან დაკავშირებით. კატეგორიულად მიუღებელია განცხადებები, რაც ჯერ მედვედევის, შემდეგ კი რუსეთის ფედერაციის საბჭოს საერთაშორისო კომიტეტის ხელმძღვანელის, გრიგორი კარასინის მიერ გაკეთდა, რომლის მიხედვითაც, მოსკოვი ყველაფერს აკეთებს, რომ ჩინეთის და ინდოეთის მიერ აფხაზეთის და ცხინვალის აღიარება მოხდეს. ეს განცხადებები ცხადყოფს, რომ რუსეთი აქტიურად ემზადება ჩვენი ტერიტორიების ანექსიისთვის, - ამის შესახებ პარტია "ევროპელი დემოკრატების" თავმჯდომარემ, პაატა დავითაიამ განაცხადა.

ის საქართველოს მთავრობას მოუწოდებს, აღნიშნულთან დაკავშირებით მკვეთრი რეაქცია გამოხატოს და შესაბამისი განცხადებები გაკეთდეს.

„მნიშვნელოვანია და საყურადღებოა, რომ ამჯერად განცხადებებს აკეთებს გრიგორი კარასინი, მომლაპარაკებელი პირი, ე.წ. აბაშიძე - კარასინის ფორმატის წარმომადგენელი, მთავარი მომლაპარაკებელი, რომლის ფუნქცია მოლაპარაკებები და არსებული პრობლემების მოგვარებაა. ამ ფონზე, როგორც აღმოჩნდა, მთავარი მომლაპარაკებელი პირი აწარმოებს პოლიტიკას, რათა ჩვენი ოკუპირებული ტერიტორიების აღიარება გაძლიერდეს.

საქართველოს მთავრობას მოვუწიდებ, მკვეთრი რეაქცია გამოხატოს და შესაბამისი განცხადებები გაკეთდეს. შექმნილ სიტუაციასთან დაკავშირებით საქმის კურსში უნდა ჩააყენონ ჩვენი საერთაშორისო პარტნიორები. უნდა გააქტიურდეს დიპლომატიური მუშაობა კარასინის მიერ დასახელებულ ქვეყნებთან, რათა მოიხსნას ჩვენი ტერიტორიების აღიარების საფრთხე.

ამასთანავე, ძალიან მნიშვნელოვანია, მოლაპარაკებების ფორმატიდან პირადად კარასინის ჩამოცილება მოხდეს, რადგან პირი, რომელიც ერთის მხრივ, თითქოს, მუშაობს სიტუაციის დათბობასა და მოლაპარაკებებზე, მეორე მხრივ, კი ღიად აცხადებს, რომ უნდა მოხდეს ჩვენი ოკუპირებული ტერიტორიების აღიარება. გრიგორი კარასინის განცახდება არის, როგორც მოლაპარაკებების და დიპლომატიის ყველა ნორმის დარღვევა, ეს არის ქართული მხარის მიმართ უპატივცემულობის ღია გამოვლინება, რის გამოც პირადად კარასინთან ყველა სახის მოლაპარაკებები უნდა შეწყდეს”, - აცხადებს პაატა დავითაია.

აღნიშნულ ინფორმაციას პარტია „ევროპელი დემოკრატები“ ავრცელებენ.