ვიცე-პრემიერი, ეკონომიკისა და მდგრადი განვითარების მინისტრი, ლევან დავითაშვილი, რომელიც უნგრეთში სამუშაო ვიზიტით იმყოფება, უნგრული ავიაკომპანიის WizzAir-ის პრეზიდენტს, რობერტ კერის შეხვდა.

ინფორმაციას ეკონომიკისა და მდგრადი განვითარების სამინისტრო ავრცელებს.

უწყების ცნობით, შეხვედრას ასევე მინისტრის მოადგილე, მარიამ ქვრივიშვილი და საქართველოს ელჩი უნგრეთში, თამარ ლილუაშვილი დაესწრნენ.

„შეხვედრაზე საქართველოს სამოქალაქო ავიაციის ბაზარზე არსებული ვითარება განიხილეს. ვიცე-პრემიერმა უნგრული ავიაკომპანიის ხელმძღვანელს ქუთაისის საერთაშორისო აეროპორტში დაგეგმილი სარეკონსტრუქციო სამუშაოების შესახებ ინფორმაცია მიაწოდა, სადაც უნგრული ავიაკომპანიაა ბაზირებული. აღინიშნა, რომ ქუთაისის აეროპორტში, 18 თვეში 3.5 კმ. სიგრძის, ფართო ასაფრენ-დასაფრენი ზოლი შევა ექსპლუატაციაში, რომელიც შეძლებს, ნებისმიერი ზომის საჰაერო ხომალდს მოემსახუროს და მეტი ავიარეისის მიღების შესაძლებლობას შექმნის. ასევე, ყურადღება გამახვილდა ავიაციის სწრაფი აღდგენის ტენდენციებზე საქართველოში, რაც დადებითად აისახა ქვეყანაში ტურისტული სფეროს განვითარებაზე. აღინიშნა, რომ ევროკავშირის ქვეყნებთან პირდაპირი რეისებისა და მიმართულებების რაოდენობა საქართველოს მთავრობის პრიორიტეტულ მიმართულებაა.

შეხვედრაზე მხარეებმა განიხილეს და შეთანხმდნენ საქართველოს მოქალაქეების WizzAir-ში დასაქმების ხელშეწყობის პროგრამების ერთობლივ შემუშავებაზე. გამომდინარე იქიდან, რომ უნგრული ავიაკომპანია ერთ-ერთი მსხვილი დამსაქმებელია გლობალურ საავიაციო ინდუსტრიაში, შემუშავდება ერთობლივი პროექტები, რომლებიც, ერთი მხრივ, ხელს შეუწყობს საქართველოს ავიაციის ინდუსტრიაში პროფესიულ განათლების განვითარებას, მეორე მხრივ კი, საქართველოს მოქალაქეებს მისცემს ისეთ მსხვილ ავიაკომპანიებში დასაქმების შესაძლებლობას, როგორიცაა WizzAir-ი.

შეხვედრაზე ავიაკომპანიის საქმიანობა საქართველოში დადებითად შეფასდა. ავიაკომპანიის ხელმძღვანელობის მხრიდან აღინიშნა, რომ ქუთაისის მიმართულება ერთ-ერთი ყველაზე წარმატებულია WizzAir-ისთვის, საიდანაც მგზავრთნაკადმა 2019 წლის მაჩვენებელს უკვე გადააჭარბა. ითქვა, რომ WizzAir-ი საქართველოს საავიაციო ბაზარზე მოწინავე ადგილს იკავებს მგზავრების გადაყვანის კუთხით. ყურადღება გამახვილდა ქუთაისის აეროპორტში უნგრული ავიაკომპანიის მეოთხე ბაზირებული ხომალდის დამატების საკითხი. ითქვა, რომ 2023 წლის 1-ელი დეკემბრიდან დაგეგმილია ავიაკომპანიის მეოთხე ბაზირებული ხომალდით ოპერირების დაწყება ქუთაისის აეროპორტში ერთი ახალი ევროპული მიმართულებით - კოპენჰაგენი, რის შედეგადაც ავიაკომპანიის მიერ ქუთაისის აეროპორტიდან ოპერირებული მიმართულებების ჯამი 28-ს შეადგენს, მათ შორის, 20 მიმართულება კი, ბაზირებული საჰაერო ხომალდით შესრულდება“, - აღნიშნულია ინფორმაციაში.