პრემიერ-მინისტრ ირაკლი ღარიბაშვილის განცხადებით, დღეიდან, წარჩინებული სტუდენტები სტიპენდიას გაორმაგებული სახით, 300 ლარის ოდენობით მიიღებენ. შესაბამისი განცხადება ღარიბაშვილმა მთავრობის სხდომაზე გააკეთა.

როგორც პრემიერმა განმარტა, აღნიშნული თანხა შესაძლოა, სიმბოლური იყოს, თუმცა, მისივე თქმით, ეს მთავრობის მხრიდან სტუდენტების დაფასებაა. ღარიბაშვილის თქმით, დეტალები მუშავდება და მინისტრის ბრძანებით დამტკიცდება.

„მოგეხსენებათ, სტუდენტებს მაქსიმალურად ვეხმარებით. მინდა ზოგადად გამოვყო ჩვენი განათლების ცენტრი, მინდა გითხრათ, რომ წლებია, ჯერ კიდევ, ჩემი პირველი პრემიერობის დროს დავაფუძნეთ აღნიშნული ცენტრი, 1 000-ზე მეტი საუკეთესო წარჩინებული სტუდენტი გავუშვით საუკეთესო უნივერსიტეტებში და სრულიად უფასოდ ვასწავლეთ მათ. ასევე, შედარებისთვის მინდა გავიხსენო ისიც, რომ ყოფილი ხელისუფლების წარმომადგენლები, მათ შორის, ყოფილი პრეზიდენტი საკუთარ შვილს ბიუჯეტიდან აფინანსებდა და საკუთარ ოჯახის წევრებსაც ბიუჯეტიდან აფინანსებდნენ, უფინანსებდნენ სწავლას, ეს არის განსხვავება. ჩვენ 1000-ზე მეტი საუკეთესო წარჩინებული სტუდენტი შევარჩიეთ და ვასწავლეთ უცხოეთის საუკეთესო უნივერსიტეტებში, რა თქმა უნდა, ზოგი ბრუნდება, ზოგი არამხოლოდ სახელმწიფო უწყებაში, კერძო სტრუქტურებში საქმდება, ეს რა თქმა უნდა, ჩვენი სიმდიდრეა და ჩვენი სიძლიერეა, ჩვენ ამ პროექტს კიდევ უფრო გავაძლიერებთ, ახალი მინისტრი ამ მიმართულებით მუშაობს. მეორე მიმართულება, რაც გვაქვს, ეს არის, ადგილზე ნიჭიერი, წარჩინებული, მაღალი აკადემიური მოსწრების სტუდენტების დახმარება, უფრო სწორად, მათი წახალისება სტუდენტების სტიპენდიების სახით. დღეს მოქმედი პროგრამა ითვალისწინებს 2 500 სტუდენტზე 150 ლარის სტიპენდიას, ჩვენ ამ სტიპენდიას გავაორმაგებთ, დღეიდან თითო სტუდენტზე გახდება 300 ლარი და 5 000 წარჩინებული სტუდენტი მიიღებს სტიპენდიას. ეს რა თქმა უნდა, შეიძლება სიმბოლური იყოს, მაგრამ ეს არის ჩვენი მხრიდან ჟესტი და დაფასება, ეს კრიტერიუმები, რომელიც შემუშავდება, მინისტრის ბრძანებით დამტკიცდება“, - განაცხადა ღარიბაშვილმა.