საქართველოს გენერალურ პროკურატურაში შეზღუდული შესაძლებლობების მქონე პირთა უფლებებზე გაეროს სპეციალურ მომხსენებელთან შეხვედრა გაიმართა

შეზღუდული შესაძლებლობების მქონე პირთა უფლებებზე გაეროს სპეციალურ მომხსენებელს გერარდ ქვინს საქართველოს გენერალური პროკურორის მოადგილე ნათია მერებაშვილი შეხვდა.

საქართველოს პროკურატურის ცნობით, შშმ პირთა შესახებ საქართველოში არსებული საკანონმდებლო ჩარჩო, პრაქტიკაში არსებული გამოწვევები, შშმ პირების მართლმსაჯულებისადმი ხელმისაწვდომობა ის მთავარი საკითხებია, რომელიც შეხვედრის ფარგლებში განიხილეს. გაეროს სპეციალურ მომხსენებელს ინფორმაცია მიეწოდა საქართველოს პროკურატურისა და შინაგან საქმეთა სამინისტროს მიერ გატარებული რეფორმების შესახებ.

„შეხვედრას ასევე ესწრებოდნენ საქართველოს გენერალური პროკურატურის ადამიანის უფლებათა დაცვის დეპარტამენტის უფროსი სალომე შენგელია, შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტის დირექტორი, მოადგილე და შსს საგანგებო სიტუაციების მართვის სამსახურის წარმომადგენლები.

საქართველოს პროკურატურა განსაკუთრებულ ყურადღებას უთმობს შეზღუდული შესაძლებლობების მქონე პირთა მიმართ ჩადენილ დანაშაულებზე ეფექტიან რეაგირებას, შშმ პირთა სისხლის სამართლის მართლმსაჯულებისადმი მისაწვდომობის უზრუნველყოფასა და სისხლის სამართლის პროცესში მონაწილე შშმ პირების უფლებების დაცვას. „შეზღუდული შესაძლებლობების მქონე პირთა უფლებების შესახებ“ გაეროს კონვენციით დაკისრებულ ვალდებულებათა ჯეროვნად შესრულების მიზნით, სპეციალიზებული პროკურორებისთვის შემუშავებულია სახელმძღვანელო მითითებები. ასევე, შემუშავებულია საქართველოს პროკურატურის შეზღუდული შესაძლებლობის მქონე პირთა უფლებების დაცვის 2023 წლის სამოქმედო გეგმა, ხოლო საქართველოს პროკურატურის 2022-2027 წლების სტრატეგიაში ცალკე თავი ეთმობა შშმ პირთა უფლებების დაცვას.

2023 წელს შშმ პირთა მიმართ ჩადენილი დანაშაულების სისხლის სამართლის საქმეების მონიტორინგის შედეგების შესაბამისად, მომზადდა შშმ პირთა და შშმ არასრულწლოვანთა მონაწილეობით არსებული სისხლის სამართლის საქმეთა ანალიზები, რომლებიც მოიცავს შშმ პირების, მათ შორის შშმ ქალებისა და არასრულწლოვნების მიმართ ჩადენილი დანაშაულების, ასევე კანონთან კონფლიქტში მყოფი შშმ არასრულწლოვნების საქმეების სისხლისსამართლებრივ და კრიმინოლოგიურ ასპექტებს. ანალიზების შედეგები, ქართულ და ინგლისურ ენებზე გასაჯაროვდა საქართველოს პროკურატურის ვებ-გვერდზე“,- აღნიშნულია ინფორმაციაში.

ირაკლი მელაშვილი - კანონის მიღებით ხელისუფლებამ საბედისწერო შეცდომა დაუშვა
ქართული პრესის მიმოხილვა 20.05.2024
ოლეგ ჟდანოვი -  პუტინმა  შეცვალა  უკრაინაში  ომის  პარადიგმა, მას კარგად ესმის, რომ რუსული არმია ნებისმიერ დროს შეიძლება ჩამოიშალოს
კახა ოქრიაშვილი - ვერცერთი ქართული ოჯახი ვერ იქნება ბედნიერი, თუ ჩვენი დიდი ოჯახი, საქართველო ძლიერი და ბედნიერი არ იქნება